Dêrsim de dewanê elewîyan de viraştişê camîyan dewam keno. Rixmo ke şar nêşino camî dewêke yan zî taxêke di camîyî virazîyenê.

Mîyanê kuçeyan de serê dîrekanê ceyranî de zî hoparlorî ronîyenê û venga ezanî nînan ra dîyena. Hemwelatîyan vera nê kerdişî nêrazîbîyayîşê xo mojna.

Serekê Merkezê Cigêrayîşê Dêrsimî (DAM) Selman Yeşîlgozî hesabê xo yê medyaya dîjîtale de rewşe sey 'bazirganîya dînî' pênase kerd û nêrazîbîyayîşê xo mojna.

Yeşîlgozî vat: ''No şaristan do vera bazirganîya şima ya dînî milê xo çewt nêkero. Rixmo ke merkezê qijî yê şaristanî de 5-6 camîyî est ê, mîyanê kuçeyan de venga ezanî pê hoparloran dîyeno. Dêrsim şaristanê elewîyan o û no kerdiş îsbatê bêtehamulîya vera bawerîya elewîyan o.''