Rêxistina HDPyî ya Dêrsimî de çarçewa Kampanyaya 'Semedê Her Kesî Edalet' de Çimeyanê Munzurî yê Dêrsimî de eşkerayîya çapemenîye kerde. Eşkerayîye ra verî heyetî Pilur de esnafî zîyaret kerdî. Wekîlê HDPyî yê Dêrsimî Alîcan Onlu, Wekîlê HDPyî yê Antalya Kemal Bulbul û îdarekarê partî tewrê eşkerayîye bîyî.

Heyetê HDPyî goş dayî meseleyanê esnafan ser û dima derbazê Çimeyanê Munzurî bi. Heyetî tay Çimeyan de cigêrayîş kerd ke tede projeyê peyzajî dîyabi destpêkerdene. Heyetî derheqê texrîbatî de qisey kerd.

Alîcan Onluyî ard ziwan ke ganî dişmenîya vera mergî ra fek bêro veradayene û vat: ''Ganî îhale nê dişmenîya vera na bawerîye bêra vindarnayene. Ganî îhale nê na hîşmendîye bêra betalkerdene. Yeno vatene ke îhale newe ra do bêra kerdene. Ê wazenê pê nê projeyî şarê Dêrsimî asîmîle bikerê.Walî seke serekê AKPyî bi serran ziwan, kultur û bawerîye şarî rê bêhûrmetîye kerde. ''

Kemal Bulbulî zî venga dêrsimijan da û vat: ''Tîya cayê heqîqat o. Tîya de munafiqîye yena kerdene û şar naye ho qeyd keno. Edalet, têdûştî û azadîye do bêrê nê erdî û gandaran. Nê erdî de ziwan, merdim, kultur û bawerîyî do azad binê.''

Eşkerayîye ra dima findî ameyî tavistene û duayî ameyî kerdene.

Çewlîg

Rêxistina HDPyî ya Çewlîgî zî çarçewa heman kampanya de esnafî zîyaret kerdî. Wekîlê HDPyî yê Çewlîgî Erdal Aydemîr û îdarekarê partî tewrê zîyaretî bîyî. Heyetî meseleyê esnafanê merkez û Kanîreşî goşdaritî. 

Aydemîrî zîyaret de îfade kerd ke ganî bi hawayêkê edîlî hukmay nêzdîyê esnafan bibo. Aydemîrî da zanayane ke seba caardişê edaletî yewîye girîng a.