Karkeranê FEDAŞî Dêrsim de 73 rojî yo seba ke şertê xebitîyayîşî û meaşê înan bêrê holkerdene çalakîye kerdêne. Vizêr çalakîya karkeran netîce daye. Karkeran taxa Sihenkî ya merkezê Dêrsimî de vizêr vejîyabî serê banê bînaya FEDAŞî û pankarta 'FEDAŞ sozê xo bîyare ca, waştişanê ma bikere' akerdbî. Pêvînayîşan ra dima waştişê karkerî ameyî qebulkerdene.

Karkerî bi sloganê 'Ma bi xoverdayîşî ser kewtî' serê banî ra şîyî war. Şarî zî pê çepikan karkerî pêşwazî kerdî.

Sekreterê Enerjî-Senî Emîn Atsizî tîya de qisey kerd û vat: ''Karkeran seba cuyêka hole û şertanê rindan têkoşîn kerdêne. Ma ewro pê kerd ke wa waştişê karkerî bêrê caardene û karkerê ke gureyî ra ameybî vetene wa abigêrê. Ma karkeran rê sipas kenê.''