Platformê Cinîyan ê Dêrsimî eşkera kerd ke wayîrê kafe Ozdal Baloyî 23ê temmuze de xebatkarêka xo ya cinîye tacîz kerde. Platformî bi sernameyê 'Ma hîş nêkenê, teşhîr kenê! Ozdal Balo faîlê hêrişê cinsîyî yo!'' fotografê Ozdal Baloyî pare kerd.

Platformî eşkerayîya xo de ard ziwan ke nê rojan de ke wedaritişê Peymana Îstanbulî rojdem de yo Dêrsim de hêrişê cînsîyî zêdîyenê. Platformî îfade kerd ke cinîyî her wextî ra zêdêr binê tehlukeyê sîstemê serdestîya camêrdan de yê.

Platformî vat: ''23ê temmuza 2020î roja pancşemeyî cinîyêka ciwane ya ke kafeyê Ozdal Baloyî de xebitîyayêne maruzê tacîzê Baloyî bîye. Baloyî cinîye rê gef wend. Dima ke cinîya ciwan gerreyê Ozdal Baloyî kerd, Balo û camêrdêkê bînî cinîye rê gef wend. Êyê ke vanê 'Ez to nê şaristanî de weş nêverdena' wa bizanê ke ê nêeşkenê nê şaristanê cinîyan ê bihêzan de biciwîyê. Şima tecawuzker, tacîker û îstîsmarker ê. Ma zî do welatêkê azad û têdûştî de biciwîyê. Cinî û wayê ma yê ke maruzê hêrişê cinsîyî benê têna nîyê. Ma do bi têkoşînê xo Dêrsim de rayîr nêdê îstîsmarkeran û hêrişkeran. Biciwîyo paştdayîşê cinîyan!''