Komeleya Heqanê Merdiman (ÎHD) yê Dêrsimî semedê Deniz Yildirimo ke Zîndanê Xarpêtî de yo testê ci yê Korona pozîtîf vejîyayo eşkerayîya çapemenîye daye. Eşkerayîya ke banê komele de ameye kerdene cinîya Yildirimî Birsene Yildirim û temsîlkarê partîyanê sîyasîyan û dezgehan tewrê ci bîyî.

Serekê komele Gurbuz Somazî bale ante ser ke vera Korona semedê tepişteyan tedbîrî nênê girewtene û vat: Zîndnan de 500yî ra zafêr tepişteyê nêweşê giranî estê ke ganî cade serbest bêrê veradayene. Nê nêweşan ra yew zî Deniz Yildirim o ke nêweşîya ci ya kanserê kolonî esta. Yildirim nika zî pê janê Korona kewto. Ma şexsê Yildirimî de wazenê ke wa heme tepişteyê nêweşî û tepişteyê ke haştî û wayûbiratîye wazenê wa cade serbest bêrê veradayene. Nêweşê ke kemoterapî vînenê bedenê înan nêeşkeno xover bido û vera nê janî zî ganî xoverdayîşo xurt bêro dayene. Coka ganî Yildirim cade bêro veradayene û  keyeyê xo de bêro tedawîkerdene.