Dewa Kilmerî ya qezaya Pulurî ya Dêrsimî de Murat Yildiz (28) 7ê gulane de seba ke heywanan rê cayêk virazo pê wesayîtê xo keyeyî ra vejîya. Yeno parekerdene ke Murat Yildiz herêma mabênê Axdad-Işikvuranî de hêrişê hawayî yê dewleta tirke de kişîyayo.

Fermandarîya Cendirmeyan a Pulurî venga keyeyê Yildizî da ke Dezgehê Tipê Edlîyî yê Meletî de seba testê DNA numûneyê gonîye bido.

Babîyê Muratî Mazlum Yildizî Ajansê Mezopotamya rê qisey kerd û vat: ''Lajê mi keyeyî ra vejîya û ma hînî tira xeberêke nêgirewte. 3 panzeran lajê mi teqîb kerdo. Şahîdan wina vat. Wexto ke mi dewe de heywanî çêrnayêne keso neşinas ame mi het û vat ke wesayîtêko vêşaye ameyo berdene bi Pulur û tede 3 kesî zî estbîyê. Mi modelê wesayîtî pers kerd, ê kesî zî vat taksî yo la serê wesayîtî pê xeyme girewte bîyo.''

Babî Yildizî pare kerd ke ê do şorê Meletî numûneyê gonîye bidê û vat: ''Wesayît nêşinasîyayêne, tira çîyêk nêmendbi. Leşkeran vat ke kesê ke wesayît de bîyî guleyî eştî helîkopterî û nînan ra kesêk zî seqat bibi. La înan senî dî ke zereyê wesayîtî de keso seqat esto? Ma vanê qey çewî ê îxbar kerdî.''

Onlu: Warê şerî de kiştişê sivîlan sûcê şerî yo

Wekîlê HDPyî yê Dêrsimî Alîcan Onluyî keyeyê Yildizî zîyaret kerd û vist vîrî ke nê 5 serranê peyênan de Dêrê Venkî û Gelîya Pilemurîye de xeylêk sivîlî kişîyayî. Onluyî vat: ''Amîranê leşkeran seba nê kesan vat 'terorîstê ke pê çekanê xo ameyî bêtesîrkerdene.' La eşkera bi ke vateyê winasênî raşt nîyê. Nê keyeyî tedayan ra semed koçê Xarpêtî kerdo, dima zî agêrayo. Nika no keye pê heywankarîye debara xo keno. Seba mergê Muratî xeylêk sebebî hûmarîyenê. Sebebê ci çi beno wa bibo warê şerî de kiştişê sivîlan sûcê şerî yo. No ciwan zî wexto ke şîyêne ware wina ame qetilkerdene.''