Bajarekê Pêrî yê qezaya Mazgêrdî ya Dêrsimî de Mudirîya Perwerdeyî ya Dêrsimî keyeyanê wendekaranê dibistane rê derheqê fikrê înan ê îmam xetîbî de tay persî pers kerdî. Şubeyê Egîtîm Senî yê Dêrsimî derheqê babete eşkerayîye daye.

Hemserekê şubeyî Huseyîn Kasunî vist vîrî ke welatanê demokratîkan de zaf vengîye yena esasgirewtene û vat: ''Rixmo ke bajarê ma de waştişê wendegehanê îmam xetîbî çîn o çarçewa polîtîkaya asîmîlasyon de nê wendegehî ameyî akerdene. Nika zî yeno cehdkerdene ke wendegehê neweyî yê îmam xetîbî berê akerdene. Mudirîya Perwerdeyî ya Dêrsimî Pêrî ya Mazgêrdî de derheqê nê wendegehan de anket şawit. Pêrî de zafê şarî elewî yo. Tîya akerdişê îmam xetîbî asîmîlasyonê bawerî û kulturî yo. Baldar o ke êyê ke dewêka elewîyan ê Xarpetî de akerdişê wendegehî raşt nêvînenî Pêrî de anket kenê. Xora fîkre şarê Dêrsimî eşkera yo. Anket hewce nêkeno. Îmam xetîbo ke 2018 de merkezê Dêrsimî de ame akerdene rixmê patdayîşê madî têna 18 wendekaran tîya qeyde xo kerd. No zî waştişê dêrismijan fîneno çiman ver ke eşkera wendegehanê îmam xetîbî nêwazenê. Ma do vera polîtîkaya asîmîlasyonî xover bidê.''