Derheqê 26ê ci tepişte 47 kesan de ke wextê xoverdayîşê xoîdarekerdişî de qezaya Sûrî ya  Amedî de mehsûr mendbî, bi îdîaya 'xerakerdişê yewîya dewlete û welatî' û 'endamîya rêxistine' Mehkemeya Cezaya Girane ya 5. ya Amedî de dewa amebî akerdene. Roniştişê dewaya Mehmet Şîrîn Aratî ame kerdene. Arat û avûkatê ci beşdarê roniştişî bîyî.

Heyetê mehkeme îdîayanê 'xerakerdişê yewîya dewlete û welatî' û 'kiştişê wezîfedarê umûmîye' ra waştişê cezaya muebede kerd.

Aratî pawitişê xo de ard ziwan ke o nê îdîayan qebul nêkeno. Aratî îfade kerd ke wexto ke Sûrî ra vejîyayêne bi gefê Fermandarê Alaya Yewine dîmenê ci ameyî girewtene û vat: ''Nê dîmenî sey senaryo ameyî girewtene. Uca de şer çinbi. Bi teda û şîdetî îfadeyê mi ame girewtene. Kesê ke mi nêşinasnenê, ez teşhîs kerda. Mi no teşhîs waşt la serekê mehkeme vat teşhîs çin o. Ez beraatê xo wazena.''

Avûkatê Aratî Altaçî zî vat: ''Muwekîlê mi kamyew serebûtî de ca girewto, gule eşto kam û zerar dayo kam? Çîyo winasên çin o. Ganî sûc bêro îsbatkerdene. Ez beraatê muwekîlê xo wazena.''

Heyetê mehkeme mabênî ra dima sûcê 'xerakerdişê yewîya dewlete û welatî' ra cezaya muebede û sûcê 'kiştişê wezîfedarê umûmîye' ra zî cezaya zîndanî ya 10 serran û 10 mengan daye Aratî.