Qezaya Tûxî ya Bedlîsî de xeylêk dewî seranê 90an de bi vêşnayîş ameybî vengkerdene. Dewijê ke mecbur mendî ke dewanê xora vejîyayî û şîyî bajaranê cîya cîyayan nika peyser agêrenê dewanê xo û newe ra dest bi ramitişê turinî kenê.

Dewa Onişqe de 15 keyeyî estê ke 2004 de dest pê peyseragêrayîşê dewa xo kerd. Dewijê ke bi ramitişê tutinî îdareyê xo kenê tutinê ke ramenê roşenê tucaranê Êlih, Îran û Wanî. Ramitişo ke aşma hezîrane de dest pê keno aşma kanûne de fêkê xo dano.

Dewijê ke badê 27 serran agêrayê dewa xo înan ra tayînan de ma qisey kerd la seba ke tim û tim dewketiş û vejîyayîşê dewa înan hetê leşkeran ra yeno qedexekerdene, seba asayîşî ma nameyê înan nêdanê. Dewijan ard ziwam ke hukmatî dewe de heme keyeyê înan vêşanyî la keyeyê mehliman hema payra û vat dewlete zirar çîyê xo nêdana, têna ma rê hêriş kena. Dewijan vist vîrî ke dewa înan çend rey ameye rijnayene la şar newe ra newe keno û vanê ke welatê çewe/î ê çew nêbeno. Coka ê welatê xo ra dûrî de nêeşkeyî bicîwîyê û agêrayî. Dewijî qerqilîyenê ke tutin bêro qedexekerdene û vanê eke wina bibo ganî ma debarê xo senî bikerê la rixmê heme zehmetîyan seba ke dewa xo de yê keyfweş ê.