Dewleta tirke îşxalê Başûrê Kurdîstanî û talanê waranê daristanan ê Koyê Cûdîyî ra dima herêma Besta de dest pê birnayîşê daran kerd. Operasyonanê leşkerîyan ê Şirnexî de warê daristanî yenê armanckerdene. Herêma Koyê Cûdîyî de bi des hezaran darî birîyayî û tede tewr tay 10 kalekolî virazîyayî.

Nê cayan de leşkerê tirkî qestî ra adir verdenê daristanan. Wextêkî verî herêmanê Metîna û Heftanîn de darî birîyayî û pê kamyonan dizîyayî. Dima PDKyî bi hawayêkê fermîyî îtîraf kerd ke no talan tesdîq kerdo.

Besta de darî pê destê qoricîyanê Şaredarîya Şenoba birîyenê. Warê cêrî yê Zîndanê Şirnexî de 15 rojî yo darî birîyenê. Darî pê kamyonan bar benê û dizîyenê. Goreyê herêmîyan rojane tewr tay 200 ton darî dizîyenê.  

Nê cayan de talanê daran ra dima kalekolî virazîyenê. Bi taybetî Besta de herinda Kulubeya Asayîşî' de kalekol virazîyayo.