Goreyê xebera RojNewsî artêşa tirke ya îşxalkere wareyê Lolanî û Koyê Şekiwyanî yê Biradostî dayî bombayan ver. Netîceya hêrişî de di dewijî birîndar bîyî. Seba ke hêrişê dewleta tirke dewam kenê ekîbê weşîye nêeşkenê biresî birîndaran.

Dîya zanayene ke dewleta tirke ya îşxalkere dewê Duhokî zî dayî bombayan ver. Seba ke hêrişî hema dewam kenê derheqê detayanê hêrişî de zanayîş nêame girewtene.

Dewleta tirke bi paştdayîşê PDKyî vera Başûrê Kurdîstanî hêrişê îşxalî rayra bena û herra Başûrê de nuqtayê kontrolî nayî ro.

Rêxistina komelê sîvîlî ya Community Peacemakers Teams (CPT) ya ke Amerîka de qeydkerdîya û merkezê ci Başûrê Kurdîstanî de yo da pêhesnayene ke rîyê hêrişanê dewleta tirke ra 162 dewî ameyî vengkerdene  û 600 dewî binê tehdît de yê. Dewleta tirke reyna sereyê serrî ra nata tewr tay 20 hezar donum erazî vêşna.

Çimeyanê cayîyan da zanayene ke hêzê îşxalî yê dewleta tirke 50 kîlometre zereyê Başûrê Kurdîstanî de xo ca kerdo.