Dewleta tirke ya îşxalkere serkêşîya AKP-MHP-Ergenekonî de şewa 23ê nîsane ra nata hêrişê Zap, Avaşîn û Metîna kena. Artêşa tirke kutikanê bi kamerayan ra heta gazê kîmyewî bi her hawayî hêriş kena. La pê xoverdayîşê gerîlayan nêeşkena. Artêşa tirke seba ke herême de mende bina xoza talan û wêran kena.

Dewleta tirke wextê hêrişan de 84 reyî herême de adir verda daristanan. Amed, Dersim, Şirnex de daristanî bi rojan vêşayî. Besta, Cûdî, Behdînan, Heftanîn û Metîna de hema zî darî vêşenê.Reyna Besta de roje de 400 tonî darî birîyenê. Başûrê Kurdîstaî de 47 dewî ameyî vengkerdene, darê 60 dewî ameyî birnayene, erazîyê zîretî zerar vînenê. Daristan, koy, dar û baxçeyê Kurdîstanî pê bombayanê fosforî û madeyanê vêşnayîşî vêşenê.

Dewleta tirke nêverdena ke Vakur û Başûrê Kurdîstanî de cayanê hêrişan de heyetê sîyasetmedar, rojnameger, ekolojîst û wekîlan cigêrayîşan bikerê. Coka mumkîn nîyo ke nê talanî bêrê belgekerdene. Herêmanê Besta, Gabar û Cûdî de ke mabênê Şirnex û Sêrtî de yê û dormeyê ci de 200 kalekolî estê bi mengan o tede şewatî estê. Şewatî tesîrê xeylêk waranê sivîlan kenê. 

Taxa Pirejmanî ya qezaya Pîranî ya Amedî de artêşa tirke 1ê hezîrane de operasyon kerd û warê daristanan de şewat vet. Şewat roja 8. de  resa dewa Çevrecîkî û Bahçekapîyî yê qezaya Arica yê Xarpêtî. Şewatî ra warê daristanan a koyê Gorse bi wele. Leşkeran Koyê Dorşînî zî da adirî ver. Darê herêmanê Şenyayla ameyî birnayene û bi kamyonan ameyî berdene.

Herêma Suwêranî ya qezaya Dara Hênî ya Çewlîgî de leşkeran şewat ver û şewat dewanê Gaz, Şêx Îsmaîl, Xodan, Sogukpinar û Doşekkaya ra vila bi. Şewatî tesîrê 20 dewan kerd. Koyê Sipî bi temamî bi wele û şewat resa Xeraba û Avnikê. Şewat de bi hezaran heyan û nebatî vêşayî merdî.

Qezaya Xozatî ya Dêrsimî de warê Amutka ya dewa Koçkozluca de hêrişê leşkerî ra dima daristan de şewat vejîya. Şewatî 6 rojan dewam kerd û warê bi 5 hektaran vêşa. Hemwelatîyan waşt şewar hewna bikerê la leşkeran nêverda. Şewatî Alîbogazi û Pulir de bi rojan dewam kerd.

Colemêrg, Bedlîs, Mêrdîn de zî şewatî vejîyayî û netîce de bi hezaran donimê zîret û daristanan vêşayî.

Hêrişanê dewleta tirke yê vera Başûrê Kurdîstanî de darî birîyayî, dewî ameyî vengkerdene û zerarêko pîl resa axpîn û baxçeyanê şarî ser. Nêrazîbîyayîşê şarî ra dima Sefîrê Berzî yê Tirkîya Hakan Karaçayî pa Hetkarê Serekê Parlamentoya Kurdîstanî ya Federe Hêmin Haramî pêvînayîş kerd û vat: ''Ma nê erazîyî kîra kerdî, ma uca de daran birnenê. Hayîya selahîyetdaran zî pê naye esta. Ma peymane mor kerde.'' 8-9ê hezîrane de heyetêkê wekîlanê parlamentoyanê Iraq û Herêma Kurdîstanî herême zîyaret kerde. Heyetî ra Şayan Eskerîyî da zanayene ke dewleta tirke 60 dewanê Başûrî de darî birnayî.

Nê prosesî de eşkera bi ke Cengîz Holdîngo ke Tirkîya de sey yewê çeteyanê 5an şinasîyeno Başûr de pê hemkarîya PDKyî pê taşeronan kewt Başûrê Kurdîstanî, darî birnayî berdî. 3 şîrketanê taşeronan ê Cengîz Holdîngî şîrketanê endamê Polîtburoyê PDKyî Elî Ewnîyî reyde Sinaht, Mêrga Şîş, Kelok, Masî Sînda û dormeyê ci e darî birnayî û berdî. 

HPGyî 24ê hezîrane de babete ser o eşkerayîye daye û vat: ''Herêmê Pawitişî yê Medya her roje pê obusan, bombayan, hawanan dîyenê bombayan ver. Artêşa tirke waranê ke tede ya darî birnayî, xozaya Kurdîstanî talan kerde.''

PDKyî rixmê nêrazîbîyayîşê partîyanê Başûrê Kurdîstanî zî destûr da ke dewleta tirke dewan veng bikera, waranê daristanan bivêşna û talan bikera.

Başûrê Kurdîstanî de herêma Berwarî, Dihok, Bêgova û Dêrekarî de nê dewî ameyî vengkerdene: Senat, Deşta Texit, Behnonê, Sorînk, Qesrok, Ava Gozê, Dêre Şeş, Mêrge Şîş, Erên, Perex, Binxirê, Bajawa, Elanş, Zawêtê, Kelok, Qir Kirank, Petromê, Kork, Kondok, Gewrik, Bazingira, Masîsa, Dergel Sindava, Comî, Bihêrî, Şeranşê Jûrê, Şeranşê Jêrê, Pîr Bala, Evlehî, Bîndiro, Banga Jêrê, Banga Jorê, Menîn, Bîrkî, Ava Toka, Şîlan, Şilîn, Kêşan, Heftenîn, Girê Biyê, Rosî, Mêrgehê, Êkmalê, Sewila Rojhilat, Sewla Rojava, Nizdorê, Hewak Golê û Xîzava.