M. Halîl Yavuzo 12 serre 3ê temmuze de Kursê Quranî yê Karşiyaka yê Mûşî de mendêne. Cenazaya ey sey berê kurdî ra dardekerde amebî dîyene. Yavuz wedarîya nêweşxane la rixmê pêro xîretan zî nêxelisîya û 10 rojan ra dima merd. Îdarekaranê kurdî pare kerd ke Yavuz xo kişto.

Raporê otopsîya Yuvuzî yeno nimnayene, dosya ser o bira nimite esta û serebûtî ser o zî qedexeyê weşane esto. Semedo ke mergê Halîl Yavuzî bêro eşkerakerdene keye û avûkatanê Baroyê Mûşî muracat kerd la înan netîceyêke nêgirewte. Rixmê pêro xîretan zî 25 rojî yo serebût nêame roşnîkerdene. Keyeyê Yavuzî vano domanê înan xo nêkişto û mergê ci şikdar o.

Serekê Baroyê Mûşî avûkat Kadîr Karaçelîlî îfade kerd ke bira nimite ya serê dosya heta amadekerdişê îdîanameyî beno ke dewam bikera. Karaçelîkî da zanayene ke ê nêzanenê ke dosya de çend delîlî estê û ê do wexto ke bira nimite wedarîyena eşkerayîyêke bidê. Karaçelîkî ard ziwan ke baroyê înan tewrê dewa bîyo û dewa teqîb kenê. Karaçelîkî vat: ''Semedo ke serebût eşkera bibo ma do xebatanê xo rê dewam bikerê.''

Çend rojî verî dewa Kodî ya Mûşî de zî kursê Quranî de malayî wendekaran rê hêrişo cînsî kerdbi.