Tîmê CPTyî yê Kurdîstanî îfade kerd ke vatişê Sefîrê tirkî yê Hewlêrî zûr ê û da zanayene ke hêrişanê dewleta tirke yê vera Başûrê Kurdîstanî de serra 2015î ra nata 85 sivîlî şehîd bîyî, 95 sivîlî birîndar bîyî.
Christian Peacemaker Teams- Tîmê Haştîkerdoxan ê Xirîstîyanan ê Kurdîstanî (CPT) pê eşkerayîyêke cewab da Sefîrê tirkî yê Hewlêrî Hakan Karaca ke îdîakerdbi ke hêrişanê înan de sivîlî nêbenê hedef. Tîmê CPTyî yê Kurdîstanî pare kerd ke hêrişanê dewleta tirke de 15ê hezîrana 2020î ra heta nika 15 sivîlî ameyî kiştene.
CPTyo ke serra 2007î de ronîya heqanê merdiman ser o xebitîyeno. Eşkerayîya CPTyî zî nê zanayîşî ca gênê:
-17ê hezîrana 2020î de bombardumanê dewleta tirke yê vera bajarekê Sîdeka de Ebas Mexdîdî (30) şehîd bi.
-19ê hezîrana 2020î de hêrişê hasmênî de Dolî Belende de 5 hemwelatîyî şehîd bîyî. Nameyê înan wina yê: Muxlîs Adem, Azad Mehdî, Dêman Omer û Emîn Salih.
-25ê hezîrana 2020î de seyrangehê Junemasî yê Silêmanî de Peymane Talîbî birîndar bîye. Lingêkê ci zî qerifîya. Mêrdê û domanê ci zî hema hêrişî de birîndar bîyî.
-11ê temmuza 2020î de dewleta tirke dewa Badyeyanî ya Dûhokî daye bombayan ver. Bombarduman de 10 keyî rijîyayî û baxçeyî texrîb bîyî.
CPTyî da zanayene ke operasyonanê dewleta tirke de serra 2015î ra nata 85 hemwelatîyî ameyî qetilkerdene û 95 hemwelatîyî zî birîndar bîyî. Goreyê dezgehî têna 6 menganê verênan ê 2020î de zî 15 sivîlî ameyî qetilkerdene.
CPTyî eşkera kerd ke hêrişanê dewleta tirke de xeylêk keyeyî ameyî vengkerdene û venga dewleta tirke da ke operasyonê xo vindarna.
