Komeleya Rojnamegeran a Dîcle Firatî (DFG) ''Raporê Binpaykerdişê Heqanê Rojnamegeran ê Aşma Gulane'' pê eşkerayîyêka nuştekîye pare kerd.

Goreyê raporê DFGyî;

-Aşma gulane de 6 rojnamegerî ameyî destbendkerdene û înan ra 2 tenî ameyî tepiştene.

- Aşma gulane de 3 rojnamegeran rê hêriş ame kerdene û derheqê 4 rojnamegeran de tehqîqatî dîya destpêkerdene. Derheqê 9 rojnamegeran de zî dewa ameye akerdene.

-Aşma gulane de 16 rojnamegerî ameyî hukmkerdene û zîndan de 2 rojnamegeran rê îşkence û têgêrayîşo xirab ame kerdene.

-3 rojnamegeran rê cezaya îlan û reklamî ameye dayene û RTUKî cezaya vindartişê weşanî daye 3 dezgehanê medya. 

-Pê tepiştişê 2 rojnamegeran hûmara rojnamegeran ê tepişteyan resaye 105.

DFGyî îfade kerd ke no resimê binpaykerdişê azadîya rojnamegeran înan rê ecêb nêno û ard ziwan ke vera rojnamegeran teda û zorbazîye dewam kenê, hukmkerdiş medya de sey teda yeno xebitnayene.

DFGyî da zanayene ke AKP-MHP wazenê modelê rojnamegerîye yê sey xo biafarnê û rîyê vîrusê Korona ra cuya rojnamegeran ê tepişteyan binê tehlukeyî de yê.