Komeleya Rojnamegeranê Dîcle-Firatî (DFG) bi eşkerayîyêke raporê xo yê menga êlule eşkera kerd. 

Rapor de dîya zanayene ke zîndanan de 63 rojnamegerî tepişte yê û vera rojnamegeran binpaykerdişê heqan dewam kenê. DFGyî pare kerd ke rojnamegerî wextê teqîbê xeberan de tim yenê astengkerdene û raştê hêrişan û şîdetî yenê. 

DFGyî vat: ''Ma do vera bêhuqûqîyan tim vengê xo berz bikerê û seba welatêkê demokratîkêrî seba medyayêka azade biqîrê.''

Raporê DFGyî yê êlule de nê doneyî cagênê: 

-12 rojnamegerî ameyî destbendkerdene, 4 rojnamegerî tepişîyayî

-3 rojnamegerî raştê şîdetî ameyî, 2 rojnamegeran rê gef ame wendene

-10 rojnamegerî ameyî astengkerdene

-Zîndanan de 6 reyî heqê rojnamegeranê tepişteyan ameyî binpaykerdene.

-6 rojnamegeran ser o tehqîqat ame akerdene, derheqê 2 rojnamegeran de zî dewa ameye akerdene. 

-Ceza dîyaye 7 rojnamegeran

-Derheqê 55 rojnamegeran de dewayî dewam kenê

 -11 weşaneyî ameyî qedexekerdene 

-286 tedeyîyê xeberan înternet de ameye qedexekerdene

-164 tedeyîyê torra medya dîjîtale ameyî astengkerdene.