Dîlok de 29 kesê ke 14ê temmuze de ameybî destbenkerdene înan ra Hemserekê HDPyî yê Dîlokî Musa Aydin zî tede 9 kesî ameyî tepiştene.

14ê temmuze de çarçewa tehqîqatêkê Serdozgerîya Komare ya Dîlokî de sereştişan de endam û îdarekarê HDP û DBPyî zî tede 29 kesî ameybî destbenkerdene. Înan ra 14 kesî vizêr îfade da. 14 destbendkerdeyî asayîş de pê îdîaya ''endamîya rêxistine'' ameyî sûcdarkerdene. Xebatê înan ê seba weçînayîşê 31ê adare zî sey persê na sûcdarîye ameyî perskerdene.

 Îfade ra dima Hemserekê HDPyî yê Dîlokî Musa Aydin,  Adnan Erol, Hurşit Besle, Abdullah Acar, Enver Ozman, Sevînçe Selçuk, Omer Sungur, Îbrahîm Dağ ve Hasan Saran ameyî tepiştene. 5 kesê bînî zî pê şertê kontrolê edlîyî ameyî veradayene.

 Hemsereka HDPyî ya Dîlokî Songule Koçdag, Hemserekê HDPyî yê Qezaya Şahînbeyî Bahrî Yariş, Alî Şîmşek, Recaî Yilmaz, Hemserekê SYKPyî yê Dîlokî Mehmet Aşkar, Remzîye Erdem, Songule Akman, Remzîye Kuş, Ayfere Dogan, Necîp Ateş, Cuneyt Kaya, Salîh Bîrîşîk, Mustafa Can û Bedîrhan Akdogan zî hema zî nezaret de yê.