Dewa Kanî ya qezaya Koye ya Hewlêrî de dewlata tirke ya îşxalkere 17ê teşrîna verêne de bi droneyê çekdarî wesayîtêk da bombayan ver. Netîceya hêrişî de ramitoxê wesayîtî Dîlovan Îşleko ke Kampa Multecîyan a Şehîd Rûstem Cûdîyî ya Mexmûrî ra yo şehîd bi û hîrê cinîyî birîndar bîyî.

Şehîd Dîlovan Îşlek bi merasîmêkê bi hezaran kesî tewrê ci bîyî ame definkerdene. Bi hezaran kesî verê Dezgehê Keyeyanê Şehîdan de ameyî têhet. Badê rêzgirewtişî Hemsereka Meclîsê Şarê Mexmûrî Fîlîze Budak qisey kerd.

Fîlîze Budak vera dewleta tirke ya îşxalkere nêrazîbîyayîş mojna û nê vatî: "Kurdê birûmetî raştê hêrişê dewleta tirke ya îşxalkere yenê. Dişmeno rezîl kurdan ra terseno. Semedê kurdêkî bi desan teyarayan wirznenê. Şehîd Dilovano ke rayîrê multecîyan de ame dinya emrê xo bi hîssanê welatperweran ravîyarna. Şarê Mexmûrî bi tewirê xo bîyo ters û xofê dişmenî. Coka dewleta tirke hewteyêk de 3 rey hêrişê Mexmûrî kerd. Vizêr zî kampe ra zaf dûrî de Koye de wesayîtê şehîd Dîlovanî hedef girewt. Ma do bi tewirê embaz Dîovanî dişmenî bin bifînê.”

Bi nameyê keyeyê şehîdî Mehmut Îşlekî qisey kerd û nêvatî: Şehîd Dîlovan şehîd ma yo verên nîyo. Wa sereyê Rayber Apoyî û şarê kurdî weş bo. Heta ke xayînîye bin mekewo, ma nêeşkenê ser bikewê. Coka ganî ma vera xayînîye bibê yew.” 

Dayîka şehîdî Helîme Îşlek zî nê vatî: "Dîlovan têna lajê mi nîyo. O domanê ma pêrun bi. Sere de Rayberîye wa sereyê gerîlayanê azadîye, xoverdayoxanê zîdanan û şarê kurdî weş bo. Ez soz dana şehîdê ma: Ez do dewaya ey cameverdî. Semedê nê çîyo ke hewce keno, ez do bikerî.”

Cenazaya Şehîd Dîlovan Îşlekî bi slogananê ‘Bimire xiyanet’ û ‘Şehîd namirin’ Goristanê Şehîde Nûjîne de ameye definkerdene.