Dewleta tirke ya îşxalkere pê paştdayîşê PDKyî û teknîkê NATOyî 14ê nîsane ra nata hêrişê Zap, Avaşîn û Metîna kena. Dewleta tirke plan kerdêne ke çend rojan de nê herêman îşxal bikera la xoverdayîşê gerîlayan hesabê înan pûç kerd.

Dewleta tirke ya ke teng bîya, seba ke ser bikewa tîmanê taybetan, hêzanê taybetan ê bi nameyê 'bordo berelî', komandoyan, çekanê kîmyewîyan şuxilnena. Dewleta tirke bêvengîya rayaumûmîya dinya ra firsend vînena û çekanê nuhleran, bombayanê fosforî zî şuxilnena.

Rixmê hende çîyan zî dewleta tirke nêeşkena bikewa tunelanê şerî yê gerîlayan. Reyna bi dîmenan eşkera bi ke dewleta tirke seba ke bikewa tunelan û mewzîyanê şerî metodanê gemarinan xebitnena. Dîmenan de aseno ke leşkerê tirkî yê îşxalkerî kutikan senî xebitnenê. Nê dîmenê ke kameraya sereyê kutikêkî ra ameyê girewtene bêçaretîya leşkeran a vera gerîlayanê HPG û YJA-Starî zî îsbat kena.

Dîmenanê bi 9 deqayan de leşkerê tirkî verî kamera û çilaya ledî bestenê sereyê kutikî û malzemeyanê bînan zî bestenê kutikî ra. Dima leşkerî kutikî benê verê tunelanê şerî, tasmaya ci akenê. Kutik nêwazeno bikewo zereyê tunelî. Leşkerê tirkî pê zorî û ezîyetî kutikî şawenê tunelan.

Kutik tunelanê şerî yê Şehîd Hewrê yê Warê Xoverdayîşî yê Şehîd Şahînî de pêkewtişan de mireno.

Dîmenêkê bînî de zî aseno ke pêkewtişê giranî yê mabênê gerîlayan û leşkeranê îşxalkeran ra dima artêşa îşxalkere tunelî ra yena pakîkerdene û merdeyê kutikî keweno destê gerîlayan.