Endamê Konseya Merkezî yê Yewîya Tabîban ê Tirkan (TTB) Dr. Halîs Yerlîkayayî derheqê tesîrê vîrusê Korona yê Kurdîstan û Tirkîya de û derheqê prosesê nikayênî de ANFyî reyde qisey kerd.

Dr. Yerlîkayayî ard ziwan ke Tirkîya hetê hûmara nêweşan ra dinya de rêzê 7. de ya û vat: ''Merdim bi nê hawayî eşkeno fam bikero ke proses hol nêno îdarekerdene. Goreyê ma tay herêmanê Tirkîya de tehlukeyê nêweşîye cidî yo. Bira sistkerdişê tedbîran birêka rew a û bedelê ci do giran bibê. Têkoşînê vera pandemîye rîyê qesawetanê sîyasî û ekonomîkan ra nêno kerdene. Ganî doneyê nêweşîye eşkera bibê. 

Nê prosesî de akerdişê merkezê bazaran (AVM) zî kewt rojdem. AVM seba komelî cayê mecburî nîyê, AVM seba menfaatanê ekonomîkan yeno akerdene. Ganî pawitişê weşîya komelî goreyê doneyanê zanistîyan bêro caardene.

Amed de hûmara kesanê ke pê vîrusê Korona kewtî tewr tay 600 kesî ya, nêzdîyê 45 kesî zî vîrusî ra merdî. Nê 600 kesan ra 90 kesî kedkarê weşîye yê. 2 kedkarê weşîye zî merdî. Hetê hûmare ra kêmbîyayîşêk esto la ganî merdimî xo sist nêkerê. Jan hema dewam keno. Nêzdîbîyayîşê sey 'Na mesele qedîyaye' raşt nîyo. ''