Endamê Komîteya Rayberdişî ya PKKyî Duran Kalkan tewrê bernameyê Mehya Haber TVyî bi û tecrîdê Îmraliyî, hêrişê îşxalî yê dewleta tirke, nêzdîbîyayîşê PDKyî ercnayî.

Qiseykerdişê Kalkanî ra beşêk wina yo:

''Ma nêzanenê ke Îmrali de rewşa Rayber Apoyî senîn a, xebera ma pê çin a ke o weş o yan nê. 200 rojî yo zî grevê vêşanîye dewam kenê. La êyê ke verî seba pêvînayîşî soz dabi bêveng ê. La komel zaf qerqilîyeno û wazeno Rayberîye ra agahîyan bigêro. Ganî çarçewa 'Hemleya Wextê Azadîye' de seba azadîya Rayberîye hîna xurt ma têbigêrê. Ganî her kes mesuldarîya xo bîyaro ca.

Zap, Metîna û Avaşîn de xeta fedayîtîye ya Zîlane ser o şerêk esto. Ganî komel nê şerî sey normalî nêvîno. No şerêko bêeman o. Ganî her kes baş bizano ke artêşa pîlêre ya NATOyî pê pêro teknîkê xo, teknolojîya xo û hêzê propaganda yê xo hêrişê ma kena. Artêşa tirke xeylêk cayan de teng bîye coka muracatê metodan ê bêexlaqan kerd. Artêşa tirke çeka kîmyewîye şuxilnena, no xeylêk reyî ame îsbatkerdene.

Têgêrayîşê ma bi ruhê fedayî û çêrî ho têkoşîn keno. Ganî no bêro dîyene. Îqtîdarê AKP-MHP seba serweerîya xo şaran xapîneno, verî zî xîret keno ke kurdan bixapîno. Nika zî keno ke merdimîye bixapîno. Erdoganî kursîyê Neteweyan ê Yewbîyayeyan de îlan kerd ke o do Başûr bivisno destî. Çewî zî veng nêkerd. Erdogan wazeno Colemêrg û Şirnex veng bikero, tede cergan ca bikero û heta peynî nê cergan bixebitno. Yanî dewleta tirke wazena dewleta cergan biaferna û bi nê hawayî kurdan qir bikera.

Tay kesî vanê çira PKK serê sînorî de şer keno? Ma qetî serê sînorê Iraq û Tirkîya de şer nêkerd. Nika cayo ke ma tede şer kenê Başûr o, sînor nîyo. PKK nêşîyo uca, cara uca de bi. Cergê înan kewtî Başûr. PDK zî hetêkî ra xîret keno ke bikewo herême. Vanê çira PKK uca de yo. Ti çira uca de ya? Artêşa tirke senî ameya uca kamî ardo? Pê sûcdarkerdişê PKKyî sûjê xo nimnenê. Wa her kes aqilê xo bigêro xo sere. Vateyê 'hêrişê terorî yê PKKyî' felan raşt nîyê.

Her cayê dinya ra xeylêk hunermend, roşnvîr, sîyasetmedar û kesayetanê kurdan vera PDKyî nêrazîbîyayîşê xo mojna. Bi nameyê Înîsîyatîfê Kurdîstanî Bipawê rêxistinêke ronîyaye, tewirê xo mojna. Embazê ma Cemal (Murat Karayilan) qisey kerd, rewşe eşkera kerde. 5ê hezîrane de o serebût qewimîya, 15ê hezîrane de Mexmûr û Şingalî dîyayî bombayan ber, 16ê hezîrane de vera Heftanînî hêriş ame kerdene. Ma venga her kesî da ke wa serebûtê 5ê hezîrane bêro cigêrayene. Ê pê 40 wesayîtanê zirxînan ameyî warê gerîlayan. Nika no yeno çi mana? No hêrişê 5ê hezîrane çira qewimîya? Ma pê mat mendî. Çunke ma pêvînayîşî kerdbi û pabeyê pêvînayîşan ê neweyan bibî.

14ê hezîrane de kombîyayîşê NATOyî ame kerdene. Wexto ke mi qiseykerdişê Erdoganî NATO de eşnawit mi serebûtê 5ê hezîrane fam kerd. Erdoganî vatêne 'YPGyî da nêweşxaneyî ro, sivîlan qetil keno.' Eşkera yo Erdoganî xîret kerd ke NATOyî ra vera PKKyî birêke bivejo. Erdoganî waşt vajo 'PKK hêrişan keno, hêrişê dostê ma PDKyî keno. Wa NATO û her kes vera PKKyî paştî bido Tirkîya.' La no kay pê xîretanê ma, rayaumûmîye û pêşmergeyanê durustan ame pûçkerdene. Çira PDK beno hacetê nê kayî? Çîyo ke PDK keno ma fam nêkenê çira keno.

Nika PDK vano PKK çira ameyo. Seke PKK newe ameyo, newe awan bîyo, têkilîya înan a bi PKKyî tewr çinbî. Ma 40 serrî verî PDKyî reyde peymanêke îmza kerde, bin de îmzaya Mesûd Barzanî û Rayber Apoyî esta. 1982 de. 12ê kanûna 1982î de ez pa Azad Berwarîyî ameya, ez mîyanê îdareyê PKKyî de bîya. Azad Berwarî zî endamê PDKyî bi. Ma şîyî deweka Rojhelatê Kurdîstanî, ma embaz Karasungurî reyde 2 reyî Îdrîs û Mesûd Barzanîyî reyde pêvînayîşî kerdî. Ma kongreya diyîne de bire girewte û ameyî Başûr. Ma seba şerê Kurdîstanî, seba şarê xo ameyî.

Ma 40 serrî yo tîya de yê, newe nêameyê. 1980 de reya verêne embaz Agîtî Başûr de kampêke naye ro. Oyo ke qereqolê Heftanînî, qereqolê Saddamî rijnayî, Heftanîn xelisna şero hempar ê gerîlayan û pêşmergeyanê PDKyî bi. Teşrîna verêne ya 1983î de wextê fermandarîya embaz Agîtî de fermandarê PDKyî zî Mulazim alî bi. Wa o raştîyan vajo. PDK sayê PKKyî de ser kewt. 1990an de ser nêkewt. Serranê 2000an de Kongreya Neteweyîye ameye kerdene. Rayber Apoyî waşt ke wa Mesûd Barzanî û Leyla Zana pîya bibê hemserekê kongre. La vanê 'PKK ma nêşinasneno, wazeno ma çin bikero.' Mi de tay fotografî estê Mesûd Barzanî, Nêçîrvan Barzanî û embaze Ronahî têkilt ronişte yê. O çax mabênê ma de têkilîye estbî. Dima se bî? Tebaxa 1985î de înan îtîfaq xera kerd, Tirkîya reyde îtîfaq kerd û vera PKKyî şer kerd.

Serranê 1990an de şerê PDK-YNKyî, şerê PDK-PKKyî tim qewimîyayêne. Serranê 2000an de PKK zî PDK zî ser kewtî. Ma pê têkilî, îtîfaq û yewîye ser kewenê. La nika ê hê dişmenê kurdan reyde îtîfaqan kenê. Ganî no nêzdîbîyayîş bêro teriknayene. Şerê 1995î ra dima çeleyê 1996î de heyetanê PKK û PDKyî pêvînayîşî kerdî, peymanêke îmza kerde. Çele yan zî sibata 1996î de ma zî tîya de îmza kerd. La dima ma eşnawit ke Nêçirvan Barzanîyî vato 'Şima çira hêrişê ma kenê. Şima ma pêroyînan, PDKyî çin bikerê zî Amerîka bê şima PDKyêkê neweyî do awan bikera.'

Nika zî Rojawan de Amerîka pêvînayîşanê mabênê PYD û ENKSî de hetê ENKSî gêna. PKK wayîrê hêzêkê çekdarî yo. Eke PKK biwazo eşkeno çekan bido bi se hezaran ciwanan. PKK 22 wîlayetan de rêxistinkerde yo, PDK 2 wîlayetan de. Ganî PDK tay raştîyan ser o vindero. Ma pê bawerîye vat yewîya neteweyîye, îtîfaqo neteweyî, dîyalogî şert ê. Ma bîlasebeb nêvat. Çira ê vanê 'Ma muhtacê Tirkîya yê.' Eke hewceyê înan pê çîyêkî esto wa ma rê vajê, şerwan û gerîlayan rê vajê.

Têkilîya PDK û PKKyî hertim kurdî vistî ser. Coka 1996 de Rayber Apoyî veng da. Ma heta peynîye hetê Înîsîyatîfê Kurdîstanî Bipawê de yê. Ma rê teslîmîyet yeno ferzkerdene la ma do ney nêkerê. PKK wazeno wa şarê kurdî ser bikewo. PDK û PKKyî pîya serranê 1980an de Başûr de şer kerd. PKKyî bi hezaran şehîdî dayî. Gelo PKKyî seba xo çîyêk waşt? Nê, têna têkoşîn kerd. PKKyî têna waşt wa kurdî ser bikewê. Ma pê bawer ê ke na raştîye do bêra dîyene û tewirêko raşt do bêro mojnayene. Vengdayîşê îdareyê ma ney ser o bo. Nameyê PKKyî ser o ma nê vengdayîşî dibare kenê.

Ma venga şarê xo, roşnvîr, hunermend, sîyasetmedar, cinî û ciwanan danê le çar parçeyanê Kurdîstanî de bi taybetî Başûr de seba ronayîşê yewîya neteweyîye têkoşînê bêmabênî bikerê û netîce bivisnê destî. Oyo ke do ser bivisno no yo.''