Endamê Meclîsê Partîya Çep a Keske sîyasetmedarê kurdî Şerîf Durmazî derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.

Durmazî ard ziwan ke hukmatê AKP-MHPyî bi rayîrê tecrîdî bêhuqûqî, bêusûlî û xizanîye zêdînayê û vat: ''AKP bi rayîrê tecrîdî wazeno komelêkê winayênî biaferno ke sereyê xo ano war û hesab nêperseno. Tecrîd sûcê vera merdimatîye yo. Birêz Ocalanî ra 3 serrî yo xeberêke zî nêna girewtene. Prosesê çareserîye de eşkera bibi ke Birêz Ocalan aktorêko polîtîk o girîng o. Seba ke meseleya kurdan bêra çareserkerdene ganî Birêz Ocalan bieşko keye û avûkatanê xo bivîno.''

Durmazî vist vîrî ke Erdoganî mabênê weçînayîşanê 7ê hezîrana 2015î û 1ê teşrîna peyêne ya 2015î de şer xorinêr kerdo û tecrîd giranêr kerdo. Durmazî bale ante ser ke bi nê hawayî îqtîdarî kerd ke tesîrê Ocalanî bikêmîno, sîyasetê kurdan tasfîye bikero û komelî bikero dişmenê yewbînan.

Durmazî da zanayene ke tecrîdê vera Rayberê Şarê Kurdî ra hînî şarê welatî nêeşkenê bi hêvî biewnê ameyoxî ra û vat: ''Coka sey têgêrayîşê sîyasî yê kurdan, sey pêro hêzanê demokratîkan, cinî, ciwanan û şaran ganî ma vera tecrîdî têkoşîn bikerê. Tecrîdê Îmraliyî ewro pêro zîndanan de yeno caardene. Bi des hezaran embazê ma sey rehîneyan tepişîyenê. Ganî pêro hêzê demokrasî vera tecrîdî nêrazîbîyayîşê xo bîyarê ziwanî. Ma sey Partîya Çep a Keske vera tecrîdî û seba demokrasî û haştîye têkoşîn bikerê.''