Fermandarê Pêroyî yê QSDyî Mazlûm Ebdîyî ke qiseykerdişê akerdişî yê Konferansê Yewîya Kurdan û Tewirê Hemparî yê Rojawanî de qisey kerd, nê vatî:

''Ez şima perûne rê spas kena ke şima tewrê konferansê ma bîyî û ma têna nêverdayî.

Ma şerê pawitişî yê herêma xo de 13 hezarî ra zafêr şehîdî dayî, bi hezaran kesî birîndar bîyî. Ez birîndaranê ma rê şîfa wazena. Ma nê konferansî dîyarîya şehîdanê xo kenê.

Sere de Serek Barzanî rê, ma KNK, Neçirvan Barzanî û Bafil Talabanî rê spas kenê. 

Ez wazena babetêke zelal bikerî, no konferans semedê parçekerdişî ne eqsê ci de semedê yewîye yeno kerdene. Yewîya kurdan eynî wextî de yewîya Sûriye ya, hêzdarbîyayîşê kurdan hêzdarbîyayîşê Sûrîyeyo. Suriye de xeylê şarî est ê. Ma Surîyeya demokratîke wazenê ke wa virar şiro her kesî ra.

15 serrî yo ma pîya bi ereb, kurd, suryanî, asûrî û heme şaran ciwîyenê, tecrubeyê ma yê îdareyê hemparî est o, tarîxê ma yo hempar est o, ma semedê pawitişê Vakur û Rojhelatê Sûrîye ciwîyenê. Pêro cehdkerdişê ma o yo ke Sûrîyeya newî de sey herême cayo ke ma heq kenê ma bigîrê.

Sûrîye bi serran o îdareyê şaran ra dûrî ameye tepiştene. Kurdan bi serran têkoşîn kerd û mojna her kesî ke şaro tewr welatperwer ê Sûrîye yo.

Ma ewro tîya ameyî têhet, kurdî konferansê xo kenê, programê xo yê sîyasîyî bewlî kenê û bi qerarê ke do tîya ra bivejîyo do hukmatê Sûriye reyde dîyalog bêro ronayene û kurdî biresê heqanê xo.

Vengdayîşê Haştîye û Komelê Demokratîkî yo ke Îmraliyî ra ame tesîrê haştîye û îstîkrarê Rojawanî zî keno. Semedê serkewtişê nê vengdayîşî çîyo ke destê ma ra yeno ma do bikerê.

Ez hêvî kena ke konferans bi serkewtişî bêro kerdene. Ez pê bawer a ke no konferans do yewîya Rojawanî bîyaro ca  û heme Kurdîstan de semedê yewîya neteweyîye bibo gamêka verêne.''