Hemserekîya Konseya Rayberdişî ya KCKyî mesajê xo de yo ke şawit Konferansê Yewîya Kurdan û Tewirê Hemparî yê Rojawanî, nê vatî:

''Embazê erjîyayeyî,

Ma sere de bi nameyê Rayber Apoyî û heme Gerîlayanê Azadîye yê Kurdîstanî delegeyanê konferansî zerrî ra selam kenê, hêvî kenê ke na gama tarîxî ser bikewo. Şorişê Rojawanî de yo ke 19ê temmuza 2012yî de ame destpêkerdene, şerê vera rejîmê Baasî, çeteyanê DAÎŞî û dewlet tirke de yo ke serkêşîya YPG, YPJ û QSDyî de ame kerdene 10 hezar kesî şehîd  û birîndar bîyî.  Ma heme kedkaranê şorişî selam kenê, şehîdanê xo bi hurmetî yad kenê û heme birîndaran rê şîfa wazenê. Bêşik no şoriş û destkewteyê ci  netîceya keda Rayber Apoyî ya. Şaro ke pabesteyê Rayberê xo yo nê destkewteyî fînayî dest. Ma pê bawer ê ke no şorişê azadîye serkêşîya cinîyan û komelî de bêro pawitene û averşîyayene.

Rayber Apoyî seba ke krudan qirkerdişî ra bixelisno û bikero wayîrê nasname û estbîyayîşî heme emrê xo da û 26 serrî yo zîndan de xover dano. Ewro zî seba ke kurdî bibê hêzdar û wayîrê heqî semedê yewîya neteweyîye veng dano. Çar parçeyanê Kurdîstanî ra şarê ma wayîrê nê vengdayîşî vejîya. Coka ma şarê xo yê Rojawanî, heme hêz û rêxistinanê ci pîroz kenê, nê tewirê bianorî yê înan selam kenê.

Mîsyono verên ê konferansê tewirê neteweyî Pawitişê Şorişê Rojawanê Kurdîstanî yo. Nê şorişî paştî daye heme şaranê herême, semedê kurdan bi çimeyê anorî. No şoriş têna semedê Sûriye nê do heme Rojhaletê Mîyanênî de verê demokrasîyî abikero.

Ma bi serran o semedê averberdişê yewîya neteweyîye cedh kenê. Ma Kongreya Neteweyîye û Yewîya Neteweyîye semedê estbîyayîşê netewe muhîm vînenê. Coka ma nê konferansê Rojawanî sey gamêka tarîxî vînenê. Her wextî ra zafêr kurdî hewceyê kongreya neteweyî yê. Ma hêvî kenê ke no konferans semedê nê bibo gamêke. Na çarçewe de ma reyna konferansî selam kenê û vanê semedê serkewtişê têkoşînê şima ma do tim paştî bidê şima. Senî ke Rayber Apoyî vato, wext wextê azadîya kurdan o.''