Dewa Koksalanî ya ke şewatê ci de 15 kesan dinyaya xo bedilnabî, şar cezaya ke DEDAŞî înan rê birnaya ra semed nêeşkeno ber bîyaro. Dewe de ne ceyran ne zî awe est a. Dewijî vanê: ‘’DEDAŞ ma rê zulm keno.’’
20ê hezîrane de 10 dewanê mabênê qezaya Xana Axparî ya Amedî û qezaya Şemrexî ya Mêrdînî de şewat vejîyabi. Şewat de 15 hemwelatîyan dinyaya xo bedilnabî. Dewijî hema zî gêrenê edaletî.
Dewa Koksalanî ya Xana Axparî ya ke dîrekê aye yê ceyranî nêameybî kontrolkerdene û vera şewatî tedbîrî nêgêrîyabî, DEDAŞî qedî mesuldarîya şewatî nêgirewte xo ser. Gerreyê dewijan ra dima zî DEDAŞî şar tehdît kerd û awa dewe zî birnaye. Dewijê ke seba ke bêawe mendê nêeşkenê zîretî bikerê.
Dewijan ra Memduh Eren û Osman Esenî ard ziwan ke DEDAŞ înan rê zulm keno. Dewijan da zanayene ke meseleyê înan ê verê şewatî eynen dewam kenê.
Memduh Erenî meseleyê nikayênî ser o bi kilmî vat: ‘’Serrêke ra nata ceyranê ma çin o. DEDAŞî nêverda ke çîyêk biramê. Bi seyan bîrê ma yê awe zî bêfayde mendî. Bi hawayêkê neheqî cezaya bi mîlyonan lîra dîyaya ma. Şewatê parînî de erazîyê ma zî çin bîyî. Zerarê ma nêame tazmînkerdene. Nika zî berardiş ma rê yeno qedexekerdene.’’
Osman Erenî vat: ‘’Şewatî dîrekanê ceyranî ra dest pêkerd. Heywanê ma, baxçe û axpînê ma vêşayî. Ma dejê giranî antî la nika zî ma vera zulmê DEDAŞî têkoşîn kenê. DEDAŞî ceyran û awe birnayî. DEDAŞî rewşa ma peygoş kerde û mexdûrîyetê ma zêdîna.’’
