Endama Kongreya Neteweyî ya Kurdîstanî (KNK) ya Amerîka Esreene Ghadri ajansê ma rê qisey kerd.

Esreene dîyar kerd ke Serekê Amerîka Donald Trumpî wexto ke Zîrveyê G7î nişka ra terikna, şi Qesra Sipîye amadekarîye kerdêne ke tewrê Şerê Îran û Îsraîlî bibo. Esreene da zanayene ke Amerîka, Fransa û Îngilîstan seba teslîmgirewtişê Îran war de û serê masa de amadekarîyê xo bi zelalî lez kerdî. Esreene îfade kerd ke hêzê Ewropa nêwazenê ke dewleta Îranî bi temamî birijîya û vat: ‘’HÊzê Ewropa Îranêkê demokratîkî nêwazenê, tena wazenê Îranî kontrol bikerê.

Rûsya û Çîn do raşta raşte tewrê nê prosesî nêbê, ê terefgîrê nê kaosî nîyê. Xora nê dewletî zî edaletî ney hêzî wazenê. Peymananê serê çek û enerjî ra Rûsya û Çîn zî nêwazenê ke rejîmê Îranî bi temamî bêro rijnayene.’’

Esreene dîyar kerd ke Şerêko Serd o Newe dest pêkeno û  no şer paştîya xo dano çimeyanê enerjî, rayîranê bazirganîye û kontrolê herême.

Esreene bale ante rewşa Rojhelatê Kurdîstanî ser û vat: ‘’PJAK seba pawitişê şarê Rojhelatê Kurdîstanî hewceyê destûrê çewî nîyo. PJAK sey sîyasî, leşkerî û îdeolojîk amade yo ke ameyoxêkê azadî û demokratîkî awan bikero. PJAK do wayîrê şarê ma vejîyo. Rijîyayîşê rejîmê Îranî verê berdî de yo. Seba kurdan wextê yewîya stratejîke yo. Eke PDK-Î û Komala nê prosesî de şarî rê îxanet bikerê no do bibo sebebê binkewtişê şarê ma.

Pêro parçeyanê Kurdîstanî de şar bi baldarî prosesî teqîb keno. Hinî bahane nêna qebulkerdene. Seba ereymendişî sebeb çin o. Parçeybîyayîş de ameyox çin o. Şarê kurdî ganî ne senaryoyê Ewropa ne zî rejîm de pêkerdiş qebul nêkero. Azadîya kurdan bi tewirêkê yewîye bena.’’