Hemserekê DBPyî yê Wanî Avûkat Cemal Demirî vengdayîşê Rayber Apoyî û qerarê kongreya peyêne ya PKKyî û nêtîceyê înan ANFyî rê erjnayî.

Cemal Demîrî bale ante meseleya kurdan ser û nê vatî: “Meseleya kurdan ameya yew merhale ke hinî bi metodanê demokratîkî çareserkerdişê ci têna hewce ney, mecbûrî yo.Têkoşînê çekdarî yê pancas serran ke serkêşîya PKKyî de yeno rayraberdene bi vengdayîşê tarîxîyî yê Rayber Apoyî yê 27ê sibate kewt merhaleyêka newî. Nê vengdayîşî têna demo ke vengê çekan ameyo birnayene nêda destpêkerdene,eynî wextî de têkoşînê azadîye yê şarê kurdî de rayîrê metodanê demokratîkan, zemînê sîyasîyî kerd a. Qerarê feskerdişê PKKyî averşîyayîşêko muhîm o. Hem hetê sîyasetî ra hem zî hetê huqîqî ra zaf muhîm o.

Nika gerek şartê Birêz Ocalanî cade bêrê holkerdene. Na game hetê huqûq û sîyasetî ra hewce kena. Berpirîsîyarîya girde ya mesleya krudan a îqtîdar û dewlete ya. Vera gamanê haştîye  bi hewayêkê hemwextî operasyonê ke yenê kerdene mojnenê ke dewlete samîmî nîya. Pêkewtiş û muzakereyî pîya yenê kerdene, coka bawerîya şarî pê çîn a. Gerek dewlete pîya bi heme dezgehanê xo bi hewayêkê zelalî tewrê prosesî bibo. Haştîye têna bi vatişî nêbena gerek bi polîtîkayan bêro caardene. 

Semedê bi tewirê seyyewbînî û azad pîyaciwîyayîşê şaran gerek qanûno bingeyî bêro bedilnayene.Verê nê zî serûberkerdişê qanûnî hewce kenê. Bitaybetî serûberkerdişê merdimî yê semedê tepişteyanê nêweşan gerek cade bêrê kerdene. Hetê bînî ra qerarê heqê hêvî yê Mehkemeya Heqanê Merdiman a Ewropa gerek cade bêro caardene. Perspektîfê çareserîya demokratîke ya Rayber Apoyî têna semedê şarê kurdî ney, mifteyê mîyanê haştîye de pîyaciwîyayîşê pêro şaranê Tirkîya yo. Cewabnêkerdişê nê prosesî têna çarserîye fîneno erey û dejanê komelkî xorî keno. Ewro ameyo bertêgêkê tarîxîyî, ya semedê haştîye gamê cesurî yenê eştene ya zî kriz xorî beno. Qerar; destê îqtîdar, meclîs û şarî de yo.”