Encamnameyê Konferansê Yewîya Kurdan û Tewirê Hemparî yê Rojawanî yo ke bi tewrbîyayîşê 400 delegeyan ame kerdene, ame eşkerakerdene. Encamname de yo ke hetê Endama Konseya Serekîye ya PYDyî Foza Yûsif û Serekê ENKSî Mihemed Îsmaîlî ra ame wendene, nê ameyî vatene:

''Konferansê Yewîya Kurdan û Tewirê Hemparî yê Rojawanî badê dîyolaganê dergan bi cedhkerdişê embazan û wayûbirayanê ma 26ê nîsana 2025î de Qamişlo de bi tewrbîyayîşê partîyanê kurdan, rêxistinanê komelê sîvîlî, têgêrayîşê cinîyan û aktîvîstanê xoseran ê herêmanê cîya cîyayan ê Sûriye ame kerdene.

Seba ke înşayê Sûriyeya newî de vînayîşêko hempar o kurdî bêro pêardene, ameyoxê Sûriye bêro bewlîkerdene û meseleya kurdan bêra çareserkerdene no konferans ame kerdene.

Şaranê Sûrîye semedê rijnayîşê rejîmî û qedîyayîşê zextî, semedê pawitişê azadîye û anorê xo ganî dayî. Kurdê ke Sûrîye de yê raştê caardişanê nê rejîmî ameyî û xeylê ganê xo qurban kerdî, bi hezaran kesî şehîd bîyî. Şarê kurdî seba ke bireso heqanê xo yê neteweyîyan û zextanê serê xo ra bixelisîyo bi serran têkoşîn kerd û no têkoşînê xo yo neteweyî pîya bi têkoşînê semedê Sûrîyeya demokratîkî rayra berd.

Konferansî tewiro hempar ê kurdan qebul kerd û wazeno  no mabênê hêzanê sîyasîyan ê kurdan, ya zî mabênê înan û hukmatê newî yê Şamî ya zî mabênê heme hêzanê neteweyan ê Sûrîye de sey bingeyê dîyalogê neteweyî wa bêro vînayene. Tewrbîyayîşê înşayê Sûrîyeya newî yeno armanckerdene ke bê înkarkerdişê pabesteyêkî, fîkran û caardişanê zîhnîyetê yewhetî ra dûr, bi asayîşê bingeyê qanûnî yo ke anor û heqanê şaran paweno, bi hurmetê tekîlîyanê herêmî û neteweyîyî yê Sûrîye  û heme şarê herême tede ca genê.

Encam: Konferans de qerar ame girewtene ke seba ke no fîkro hempar bêro caardene heyetêk do bêro ronayene ke hetanê eleqedaran dir pêvînayîşan bikero û dîyalogan bikero.''