Faruk Demîr, weçînayîşê serra 2014’î de bibi şaredarê DBP’yê Ebexê, la qeyûm tayînê cayê ey bibi. Faruk Demîr û Leyla Atsake seba ke weçînayîşê 31’ê Adare de bibê şaredar û peynîya îdareyê qeyûmî bîyarê xebetînê û şarê xo reyde tevdîrîya xo vînenê.

Ebexê, derya ra 2 hezar û pancas metre berz o û zimistanî germîya hewayî beno kêmîyê 45 dereceyî. Ebexê her çiqas ke sînorê Îranî de bo zî berê sînorî nêameyo akerdene û sînor de dês ameyo viraştene. Bazirganîya sînorî qedexe ya. Şaredarîya Ebexê rê serra 2017’î de qeyûm amebi tayînkerdene. Şarê Ebexê naye ra ver, reyê xo se ra 75 daybî HDP‘yî û vanê ma do nê weçînayîşî de reyanê xo bivejê se ra 90.

Faruk Demîr, weçînayîşê serra 2014’î de bibi şaredarê DBP’yê Ebexê, la qeyûm tayînê cayê ey bibi. Faruk Demîr û Leyla Atsake seba weçînayîşê 31‘ê Adare sey hemserekan bîyî endamê şaredarîye. Atsake serra 1994 de Ebexê de ameya dinya û heta lîse perwerdeyê xo Ebexê de kerdo temam û Wan de unîversîte wenda. Şaredarîya Ebexê de sey sosyolog xebetîyaya û xebatanê cinîyan de ca girewto. Wexto ke qeyûm tayînê şaredarîye bi, kar ra ameya îxrackerdene.

Demîr zî serra 1975’î de taxa Ebexê, Noşara Jorî de ameyo dinya û perwerdeyê xo yo verên tîya de dîyo û peyê cû Muradîye de lîse kerda temam. Demîr xeylî bajaran de karê înşaatî kerdê. 2017 de sey hemserekê Şaredarîya DBP’yî yê Ebexê ame weçinîtene û Sibata 2017’î de bi tayînbîyayîşê qeyûmî tepişîya û erzîya hepisxane. Demîr yew serre hepisxane de mend û peyê cû bi şertê kontrolê edlîyî ame veradayene.