Endamê verênî yê Heyetê Îdareyî yê PDKyî Edhem Barzanîyî ANFyî rê qala tehlukeyê hêrişanê îşxalî yê dewleta tirke yê vera Başûrê Kurdîstanî kerde.

Barzanîyî îfade kerd ke Tirkîya pê bahaneya PKKyî hêrişê Başûrê Kurdîstanî kena û vat: ''La Tirkîya Başûr îşxal kena. Hêzo ke cayanê berzan eşkeno kontrol bikero do bieşko Dihok, Hewlêr, Kerkûk, Mûsil û Tîkrît zî kontrol bikero. Eke Tirkîya nê cayan de ca biba cayanê bînan zî îşxal kena. Tirkîya şora kamca rayîran virazena, ceyran bena û awe bena ci. No îşxal o. Heyetanê Parlamentoya Herêma Kurdîstanî nînan ser o raporî amade kerdî û bale ante îşxalî ser.''

Edhem Barzanîyî vist vîrî ke Peymana Lozanî 2023 de qedîyena û Tirkîya wazena nê di serran de pêro erdê Başûrî de ca biba û Mûsil zî îlaweyê erdê xo bikera.

Edhem Barzanîyî vat: ''Mi venga Parlamentoya Herêma Kurdîstanî, Serekîya Herême, Yewîya Ewropa û Komkara Ereban dabi ke wa îşxalê Tirkîya vindarnê. Ganî pêro hêzî na babete de baldar bibê. Ganî pêro merdimê bişeref û selahîyetdarê rûmetînî yê Başûrî vera nê îşxalî vinderê. Eke herêma Kurdîstanî seba vindarnayîşê hêrişan çîyêk nêkera beno ke herêma Kurdîstanî zî destî ra şora.''

Edhem Barzanîyî da zanayene ke Başûr de tay kesî seba ke verê îşxalî bigêrê xebitîyenê û vat: ''Ez zî paştî dana înan. Ez seba çareserîyêke şina teber, Başûrî ra vejîyena. La dima do abigêra.''