Xeylêk hewmelatî û dezgehanê Başûrê Kurdîstanî vera bombardumanê dewleta tirke nêrazîbîyayîşê xo mojna. Endamê Komîteya Merkezî ya PDKyî û berpirsîyaro verên ê  Silêmanî Edhem Barzanîyî zî vera îşxalî tewirê xo mojna.

Dewleta tirke ya îşxalkere çend rojî verê cû dewa Kanî Mezin a herêma Kanîmasê ser o bombayî varnayî û mamosta Xalid Ebdulrehman Şmesedîn hêriş de şehîd bi. Edhem Barzanîyî nê hêrişî ra dima mesajêk weşana. Barzanîyî hukmat rexne kerd ke vera hêrişanê dewleta tirke şar bêpawitiş verdayo.

Edhem Barzanîyî hesabê xo yê şexsîyî ser o no mesaj weşana: ''Bi xemgînîyêka pîle mi eşnawit ke bombardumanê teyarayanê şerî yê tirkan de mamosta Xalid Ebdûlrehman Şemseddîn şehîd bîyo. Hêriş û bombardumanê teyarayanê şerî yê tirkan de bi desan merdimê ma yê svîlî şehîd bîyî. Ez wazena ke wa verê înan bêro akerdene ke xo bipawê yan zî tay hêzî înan bipawê.''

Barzanîyî wextê hêrişanê dewleta tirke yê vera Efrînî de radyoyê Dengê Amerîka de qisey kerdbi û vatbi ke dewleta tirke Efrînî ra dima verê xo do bida Başûr û uca zî îşxal bikera.