Platfromê Kede û Demokrasîyî yê Dêrsimî seba ke Dogukan Gul 11ê nîsane de Mudirîya Asayîşî yê Dêrsimî de raştê îşkenceyî ame bi eşkerayîyêke nêrazîbîyayîş mojna. Eşkerayîya ke Kuçeya Sanatî de ameye kerdene Wekîlê HDPyî yê Dêrsimî Alîcan Onlu zî tewrê ci bi.

Hemserekê ÎHDyî yê Dêrsimî Gurbuz Solmazî ard ziwan ke Gulo ka raştê şîdetê polîsan ameyo muracatê înan kerdo û vat ê do çirey vera neheqîye bêveng memanê. Serekê Baroyê Dêrsimî Kenan Çetînî zî îfade kerd ke înan badê serebûtî xeylêk dezgehanê eleqedaran reyde pêvînayîşî kerdî û vat hêrişkarî ganî cade karî ra bêrê girewtene û bêrê cezakerdene.

Alîcan Onlu zî vat: ''No faşîzm têna Dêrsimî de nê, her cayê Kurdîstan û Tirkîya de xoza, merdim, kedkar û wîjdanan qetil keno. Eşkerayîya walîtîye serebûtî ra giranêr a. Nê hêzê dewlete ke şarî pawenê ê nîyê. No serebûto edlî nîyo. No hêrişê dişmenîye yê vera ziwan, kultur, bawerî û hêr çîyê nê şarî yo. Nê çete yê. Walîyo ke serekê AKPyî yê bajarî yo bitehluke kay keno. Eke şima cigêrayîşê heq huqûqî nê çeteyan rê verdê, no şar zî tedbîranê xo bi xo geno. Eke hêzê dewlete sey çeteyan têgêrenê, şarê ma do xo bipawo.''