Emîne Şenyaşara ke mêrde û di lajê ci hetê merdimanê Wekîlê AKPyî Îbrahîm Halîl Yildizî ra ameybî qetilkerdene 106 rojî yo lajê xo Ferît Şenyaşarî reyde verê Edlîyeya Riha de nobeta edaletî kena.

Wextê çalakîye de Ferît Şenyaşarî Ajansê Mezopotamya rê qisey kerd û vat: ''Ma tîya de çalakîya roniştişî nêkenê. No têkoşînê heqgirewtişî yo. Ma 106 rojî yo verê edlîye de yê la hema averşîyayîşêk çin o. Ma waştbi dozgeran reyde ronişê la waştişê ma ame redkerdene. Ma do ewro waştişnameyêkî bidê înan ke wa derheqê sebebê redkerdişî de agahîye bidê ma. Ma do cewabê înan vila bikerê.''

Emîne Şenyaşar qala rewşa weşîye ya xo kerde û vat: ''Hînî çimê mi nêvînenê. Dîlok de ez muayene bîya, doktorî vat gereka ez amelîyat biba. Heta ke lajê mi Fadil nêro veradayene ez do tedawî nêbiba û tîya ra nêşora. Ez bimira zî tîya de mirena. Bînaya mehkeme her kesî rê serbest a la ma rê qedexekerde ya. Wa qeydê nêweşxaneyî bêrê eşkerakerdene. Wa kesê ke no qirkerdiş kerd bêrê tepiştene. Çira ê nêtepişîyenê?''