Fermandarê Qerargehê Merkezî yê HPGyî Bahoz Erdalî beşdarê bernameyê taybetî yê Stêrk TVyî bi û hem kombîyayîşo serrane yê HPG hem zî xoverdayîşê Garê ercnayî.

Qiseykerdişê Bahoz Erdalî ra beşêk wina yo:

''Gerîlayan Garê de derbêka pîle daye dişmenî ro. Dewleta tirke tim propaganda kena ke gerîlayî vera teknîkê înan nêeşkenê xo ver bidê şer bikerê. Labelê şehîd Şoreş û embazanê bînan na propaganda pûç kerde. Îşxalkeran reyna fam kerd ke ameyîşê koyanê Kurdîstanî hende rehet nîyê, bedelê ci estê. Ê do reya bîne verî ke bêrê zêdêr bifikîrê. No serkewtiş coşêkê pîlî dano ma.

Gerîlayan reyna mojna ke ê do nê şarî û welatî bipawê. Garê bîye yê pêro kurdan. Êyê ke tewr zaf kêfweş û sereberz bîyê behdînanij ê. Eke îdareyê Başûrî destûr bidêne şarê ma do Akrê, Amedîyê û Sersingê de şayîyê pîlî bikerdêne. Şarê Başûrî pê hesîya ke dewleta tirke hêrişê pêro kurdan kena têna hêrişê PKKyî nêkena.

Seba 13 esîran xeylêk çîyî ameyî vatene. Xora eşşkera yo 13 esîrî zî hetê artêşa tirke ra kişîyayî. Fermandarîya ma zî venga dezgehanê mîyanneteweyîyan da ke wa bêrê Garê de cigêrayîşan bikerê. Nê esîrî 6 serrî ma hetî de bîyî. Nêzdîbîyayîşê ma yê vera esîran eşkera yo. Eke dewleta tirke raşta zî biwaştêne esîran bixelisna herinda 40 teyarayanê şerî de 4 kesê demokrat û haştîwazî bierşawitêne bes bîyêne.

Ma heta nika zaf esîrî vera dayî. Narey zî îmkanê ci estbî la hukmatê AKPyî waşt nê esîran ceza bikero. Îstîxbaratê nê operasyonî hetê Hakan Fîdanî ra ameyî peydakerdene, plansazî hetê Hulusî Akarî ra ameye kerdene û ferman hetê Erdoganî ra dîyayî. Nê 3 kesî mesuldarê kişîyayîşê 13 esîran ê.

Kombîyayîşê ma yê serran 9 rojan dewam kerd.Ma hêrişê îşxalî, metod û teknîkê hêrişan, xoverdayîşê gerîlayan ê 2020î, kêmasîyê xo ercnayî û analîz kerdî. Babetêka rexneyî ya gerîlayanê Kurdîstanî na bîye embazî zêdêr pê xo bawer ê û no ge ge beno sebeb ke dişmenê xo qij bivînê. No dîsîplîn û asayîş de qelsîye virazeno.

Kombîyayîşê ma tecrubeyê ma yê 37 serran ercna. Ma wayîrê tecrubeyêkê şerî yê pîl ê. Ma artêşa ke vera ma de ya hol şinasnenê. Ma hêzê xo zî baş şinasnenê. Ma pê bawer ê ke kombîyayîşê ma do bi hawayêkê pozîtîfî tesîrê gerîlayan bikero. Eke netîceyê kombîyayîşê ma bikewê dewre ma do Garêyanê neweyan bivînê. Ma de tay dîsîplîn û tedbîrî kêm ê.

Tay vanê no dewrê newe yo û vera teknîkî de şansê gerîlayan çin o. Ma Garê, Heftanîn, Herêmanê Pawitişî yê Medya de eqsê ney îsbat kerd.

Xoverdayîşê Garê de tewirê şarê Başûrî ercîyaye û fîraz bi. Şarê Başûrî zaneno ke dişmenî PKK xo rê kerdo mane. Seba îdareyê Başûrî 2 esasî estê. Yewîn şarê ma û têgêrayîşê ma înan ra tewirêkê pozîtîfî pawenê. KCKyî bi hawayêkê eşkerayî vat ke ma pêşmergeyan û îdareyê Başûrî rê hûrmet kenê. Ganî îdareyê Başûrî zî wina bikero û PKK û têgêrayîşê ma rê hûrmet bikero.

Diyîn; ganî îdareyê Başûrî armancê îşxalê dewleta tirke bivîno. Selahîyetdarê Başûrî vanê hemwelatîyî tay dewan de rehet nêeşkenê têbigêrê. Eke dewlete bikewa nê herêman kes nêeşkeno şoro Hewlêr yan zî Dihokî.

Seba Hulusî Akar û înan PKK sebebê her çî yo. PKKyî ra nêbîyêne Tirkîya do hêrişê Îranî bikerdêne, DAÎŞ xurt bibîyêne, Kafkasan de alozîye qewimîyayêne. PKK pê estbîyayîş û têkoşînê xo dewleta tirke keno qels. PKKyî ra nêbîyêne îdeolojîya Osmanijan-Turanan ya faşîste do bibîyêne sebebê têmîyanîyan û Erdogan zî bibîyêne Hitler yan zî Seddamê nê dewrî.

Nika Amerîka de îdareyêko newe esto. Înan heta nika kurdan ra fayde dî la zerar nêdî. Ma sey PKKyî amade yê ke seba haştîye û aramîye bixebitê. Hesabê ke do PKK teber de verdê nêrê caardene. Ma têna Amerîka nê venga pêro hêzanê herêmî û mîyanneteweyîyan danê ke dîyalogê bi PKKyî înan rê fayde yo. Niha her cayê dinya ra merdimî wazenê Rayber Apo azad bibo û PKK lîsteya terorî ra bêro vetene. Koalîsyono mîyanneteweyî yê vera DAÎŞî zî deyndarê PKKyî yo.

Erdogan û dewleta tirke pê bahaneya PKKyî hêrişê Başûr û Rojawanî kenê. Mexmûr,Kobanê, Şingal, Hewlêr de key hewcedarî virazîyaye, tengîye estbî PKK resa nê cayan. PKKyî Rojawan û Başûr de fedakarîyêka pîle kerde. PKKyî ra nêbîyêne dewleta tirke tehamulê Başûrî nêkerdêne. Dewleta tirke wina propaganda kena ke PKK seba kurdan mesele ya. La PKKyî ra nêbîyêne dewaya kurdan çinbi. Wa her kes na raştîye bivîno.

Alozîya Sûrîye dewam kena. Prosesê Cenevre û Soçî vindertî. Çareserîye modelo sîyasî yo demokratîk o. Ma sey têgêrayîşî ney pêşnîyaz kenê. Kurdî yewîya Sûrîye rê hûrmet kenê la alaya Baasî problem a. Ganî no çareser bibo. Projeyê Neteweya Demokratîke seba pêro kurdan û sûrîyeyîjan çareserî ya. Kurdî nêwazenê Sûrîye parçe bikerê wazenê azad bibê.

Karabag de eşkera bi ke dewleta tirke kurdan reyde dişmenê ereban, armenîyan o. Xora na hîşmendîya Osmanijan a. Kurd û erebî nika heman cepheyî de vera hîşmendîya îşxalkere têkoşîn kenê. Kurdî û PKK zî rayberîya na hîşmendîya kenê. Mîyanê ereban, roşnvîranê înan de seba Rayber Apoyî û têgêrayîşê ma sempatî esta. Ê zî vînenê ke kurdî vera heman hîşmendîye têkoşîn kenê.

Nê wextî de raştîyêke vejîyaye werte ke a zî raştîya ruhê Garê ya, serkewtişê Garê ya. No seba pêro kurdan kêfweşî yo. Dişmenê ma destê ci de çi îmkan esto vera ma xebitneno. La ma pê ruhê Garê xo ver danê. Ganî pêro şarê ma bibo wayîrê nê ruhî. Bi taybetî ciwnî ganî pê ruhê Garê têbigêrê. Ciwanî wayîrê rûmetî yê coka dişmen înan keno hedef. Destê dişmenî de têna teror û zîndanan estê. Destê ma de rûmetê ma esto. Ciwanê kurdî ganî pê ruhê Garê têbigêrê û verê xo bidê koyan.''