Colemêrg hetê çimeyanê binê erdî ra warêko zengîn o. Colemerg de çimeyê tewr pîlêr ê çînko û erjîjî estê. Colemêrg pê rezervê xo yê çînkoyî yê 40 mîlyon tonî dinya de asta yewine de yo. Çînko û erjîjê şaristanî hetê şîrkertanê taybetan ra yenê vetene. 

La rixmê nê çimeyan zî Colemêrg şaristananê tewr xizanan ra yew o. Colemêrg de bêkarî û xizanî se ra 80 ê. Naye ra şaristanî ra zaf kesî koçê Îstanbul, Antalya, Mersîn, Anqara û Îzmîrî kenê.

Şarê Colemêrgî nê çimeyanê Çînko û erjîjî ra nêeşkeno îstîfade bikero. Hetê bînî ra rîyê nê madenan ra aw û erdê herême zî herimîyenê. 

Ciwanêkê colemêrgijî yê 26 serrî yo ke Wan de restaurantêk de xebitîyeno vat ke 4 serrî verê cû bêkarîye ra koçê Wanî kerd. Ciwanî ard ziwan ke çimeyê serî û binê erdî yê Colemêrgî hetê dewlete ra yenê talankerdene, cayanê cîyayan rê erşawîyenê, ê zî bêkar vera dîyenê û xozaya Colemêrgî yena talankerdene.