Vizêr saete 24:00î ra heta serê sibayê ewroyî hêzanê artêşa Iraqî pê hetkarîya hewayî ya hêzanê Koalîsyonê Mîyanneteweyî nêzdîyê dewa Elî Reşî yê koyan Qereçoxî yê bajarekê Qeracê de vera cayanê cerganê DAÎŞî operasyonêko hempar ard ca. Operasyon de cebilxaneyê DAÎŞî ameyî îmhakerdene. 

Herêma operasyonî qasê 10 kîlometreyan nêzdîyê Kampa Şehîd Rûstem Cûdîyî ya Mexmûrî ya.  Hêzanê artêşa Iraqî hêzanê Koalîsyonê Mîyanneteweyî reyde vizêr Kerkûk de vera DAÎŞî operasyonêk kerdbi.

Fermandarê Pêroyî yê Hêzê Taybetî yê Lezabezî yê Iraqî Samir Husênî pê eşkerayîyêka çapemenîye pare kerd ke destpêk de teyarayanê şerî yê hêzanê koalîsyonî herême da ver bombayan û dima zî hêzanê erdî dest pê operasyonî kerd. Hûsenî vat: ''Roja yewine ya operasyonî de Daqûq de 17 dewî ameybî eşkerakerdene û înan ra 9 dewî ameyî xelisnayene. Heman wextî de rolê pêşmergeyan zî baş bi.'' 

Fermandar Hûsenîyî îfade kerd ke roja yewine ya operasyonî de wesayîtêko bombabarkerde û 35 mayînî ameyî bêtesîrkerdene. Hûsenîyî ard ziwan ke başûrê rojhelatê Kerkûkî de 2 cergê DAÎŞî yê ke xîret kerdêne hêriş bikerê ameyî kiştene.