Mamreşo de xoverdayîşê 10 rojan de destanî ameyî nuştene. Mamreşo de gerîlayan Serhat, Kamûran, Sarya, Xebat, Canfeda, Rûkene û Zafer vera gazê kîmyewî, bombardumanan û çeteyan xo ver da. Zafer nê xoverdayîşî de pê hûyayîşê xo, çeka xo vera leşker û çeteyanê tirkan vindert.

Zafer şaristanê Qamişloyî yê Rojawanî de dadîya xo ra bibi. Gerîlatîya Vakurî xeyalê ey bi. O erdê Başûrî de şehîd bi. Yanî gerîla Zafer Kurdîstanî bi. O eşkayêne ziwan, kultur, nasname û fekê pêro herêman bimuso, her warê Kurdîstanî de gerîlatîye bikero. O eşkayêne a hele xeylêk waran de estbo. 

Zafer 2013 de tewrê gerîlayan bi û serranê verênan de Rojhelatê Kurdîstanî de gerîlatîye musa. Zaferî rê Rojhelatê Kurdîstanî bi taybetî Şaho cîya bi. Wexto ke ey sorankî qisey kerdêne yan zî bi sorankî şîîrî wendêne çewî nêvatêne qey o rojawanij o. Wexto ke embazan tira pers kerd ke 'Ti kamca ra yî Rojhelat, Rojawan yan zî Vakurî ra?' Ey va 'Her parçeyî ra tayêk mi de esto la ez bi xo tewr zaf gerîla ya.' Rayraşîyayîşê ci de no ruhê gerîlatîye û hîşmendîye estbî.

O nika avaşînij bi. O zagrosan de gerîla bi, gerîlatîye musa û tede têkoşîn kerd. O wextê çêrîye yê emrê xo de Zagrosan de bi. her hela şer û cuye de wezîfeyê xo ser bi. O tim xeylêk cayan de, karanê cîyayan ser de bi. Ge patîkayanê çetinan ra embazanê xo rê erzaq berdêne ge destê ci de çeke şîyayêne çalakîye ge mitbax de embazanê xo rê datlî viraştêne ge şîîrî wendêne ge zî nuştêne. Tewr zî huyayêne.

Zafer Tolhildan gerîlayanê yewina têgêrayîşî ya Avaşînî ra yew bi. Zafer hem girê dayeyê cuye bi hem zî zanayêne ke Kurdîstan de cuye bê mucadele mumkîn nîya. Werteyê menga nîsane de yewina têgêrayîşî perwerde kerd temam û derbazê dewrê pratîkî bi. Zafer gerîlayêko qerardar û aktîf ê na yewine bi.

Verî ke derbazê warê Mamreşoyî bibo wina vatbi: 'Dişmen qala hêrişê Avaşînî keno. Ma Avaşînî dişmenî rê kenê jehr.' Wexto ke dewleta tirke 23ê nîsana 2021î de hêrişê Avaşînî kerd Zafer û 6 embazê xi mewzîyanê Mamreşoyî de bîyî. Zafer rixmê ê gazê kîmyewî, bombardumanan pê îradeyê Apogîrî hacetê bêtelî rê pê hûyayîşê xo moral dayêne. 

Key o huyayêne embazan vatêne 'Zafer seke şayîya fîrazkerdişî de yo şer de nê.' Zafer û 6 embazanê ci 10 rojan pê na bawerîye şer kerd. Zafer pê manaya nameyê xo têgêra. Artêşa tirke ya ke pê 7 gerîlayan nêeşkaye peynî de gazo kîmyewî xebitna. Şehadetê nê 7 gerîlayan nîşaneya binkewtişê artêşa tirke bîye. Şehadetê xoverdayoxanê Mamreşoyî artêşa tirke ro derbêka winasêne bîye.