Merkezê Îrtîbatî û Çapemenîye yê HPGyî (HPG-BÎM) 3 gerîlayê ke xebatkarê HPG-BÎMî bîyî û 2018 de şehîd bîyî bi eşkerayîyêke yad kerdî.

Eşkerayîye wina ya:

''Seba ke têkoşînê azadîye û destanwarî yê gerîlayanê azadîya Kurdîstanî pêro dinya rê bidê şinasîyayene embazanê ma Alî, Xemgîn û Helgurtî mîyanê xebatanê HPG-BÎMî de ca girewtêne û  bîyî wayîrê kedêka pîle. Nê embazê ma 10ê temmuza 2018î de hêrişê dişmenî de şehîd bîyî. Nê embazanê ma serkêşî, fermandarî û kedkarîya xebatanê HPG-BÎMî kerde. Ma înan serrgêra şehadetê înan de bi rêzî yad kenê. Ma soz danê ke têkoşîno ke şehîdanê HPG-BÎMî dewrê ma kerdo, biresnê serfîrazîye, têkoşînê fedayîyî û raştîye yê gerîlayanê azadîye pê şaranê dinya bidê hesnayene.

Nasnameyê embazanê ma yê şehîdan wina yê:

Embaz Alî Kanîroj dewa Mamxurî ya qezaya Şîşemzînî ya Geverî de dadîya xo ra beno. Embaz Alî 2005 de wexto ke Zanîngehê Wanî de wendêne şehadetê embazanê xo Alî û Firatî ra dima tewrê gerîlayan beno. Embaz Alî Çarçella de dest pê gerîlatîye keno û dima mîyanê xebatanê Fermandarîya Qerargehê HPGyî de ca gêno. Dima 2007 de o tewrê xebatanê çapemenîye yê HPGyî beno û embaz Xelîl Dagî reyde xebitîyeno. Dima ke embaz Xelîl 2008 de şehîd beno, embaz Alî hîna zaf giranîye dano xebatanê çapemenîye û agahîyanê serê şehîdan.  Embaz Alî pê kamera, çek û bara xo ya girane koyanê Kurdîstanî ra gêreno û keno ke vengê pêro gerîlayan bido eşnawitene. Embaz Alî pêro dîmen û dokumenteranê serê gerîlayan de wayîrê kedêka pîle yo. O wextêk serkêşanê partîya ma Kasim Engînî reyde zî xebitîyeno û ey rê îstîfade keno. Embaz Alî dima ke Akademîya Hakî Karerî de perwerde dî 2012 de derbazê Botanî beno. Heta serra 2016î embaz Alî gerîlatîya Botanî ser o nuseno, fotografan û dîmenan qeyd keno. Embaz Alî têna pê xebatanê xo yê çapemenîye nê pê şerwanîya xo zî bale anceno û Botan de sey fermandarêkî têgêreno. Embaz Alî 2016 de israrê embazanê xo ser o derbazê Herêmanê Pawitişî yê Medya beno û tîya de amelîyet beno. Amelîyetî ra dima Akademîya Mahsum Korkmazî de ser fermandarî wezîfe keno û gerîlayan perwerde keno. O dima sey yew westa agêreno xebatanê çapemenîye û hêrişê dişmenî de pa embaz Xemgîn û Helgurtî şehîd beno. Embaz Alîyo ke 13 serran sey gerîlayî têkoşîn kerdbi, ma rê arşîvêko zengîn û mîrasêkê têkoşînî yo pîl verdayo.

Embaz Xemgîn Amed de keyeyêkê welatperwerî de dadîya xo ra beno. O verî mîyanê xebetanê şorişî de ca gêno, di reyî tepişîyeno û çar serran zîndan de maneno.  Dima ke zîndanî ra vejîya zî 2013 de verê xo dano koyan. O Metîna de dest pê gerîlatîye keno, 2014 de Akademîya Gurbetellî Ersoz de perwerde vîneno û xebatanê çapemenîye de ca gêno. Embaz Xemgîn 2016 de Endamê Konseya Rayberdişî ya KCKyî û Fermandaranê partîye ra Dr. Savaş Amedî reyde xebatan keno. Embaz Xemgîn mîyanê xebatanê çapemenîye û xebatanê arşîvî de ca gêno. Rixmo ke lingê xo ra birîndar beno zî o nêvindeno. 2017 de akademîya leşkerîye de perwerde vîneno û dest pê pratîkî keno. O do pê kesayetê xo yê kedkar û durustî tim embazanê xo rê bibo mîsal.

Embaz Helgurt Nisêbîn de dadîya xo ra beno. O 2014 de tewrê gerîlayan beno û verî Qendîl de dest pê gerîlatîye keno. Embaz Helgurto ke pê marîfetê xo yê tîyatroyî şinasîyayêne, pê çimdarî û dîqatê xo mîyanê gerîlayan de ca gêno. Embaz Helgurt dima tewrê xebatanê HPG-BÎMî beno û pê kedêka pîle xîret keno ke vengê gerîlayan bido eşnawitene. Embaz Helgurt pê kesayetê xo mazharê heskerdiş û hûrmetê embazanê xo beno. O pa embaz Alî û Xamgînî hêrişêkê dişmenî de şehîd beno. Ma do vîrameyîşê ey qetî Kurdîstanê azadî de bidê ciwîyayene.

Sere de keyeyanê înan ê ercîyayeyan rê ma pêro şarê welatperwerî yê Kurdîstanî rê serweşîye wazenê. Ma soz danê ke xeyalanê embazanê xo bîyarê ca.''