Fermandara YJA-Starî Ferîde Alkan hêrişê dewleta tirke yê vera Kurdîstanî ANFyî reyde ercnayî. 

Qiseykerdişê Ferîde Alkan ra beşêk wina yo:

''Dewleta tirke ya îşxalkere vera şarê kurdî, gerîlayan şerêkê çetinî kena la vera nînan çalakîyê gerîlayan zî dewam kene. Şarê kurdî pê xoverdayîşî cewab dano nê şerî. Vera faşîznî têna pê xoverdayîşî ma eşkenê ser bikewê. Dişmenî wazenê pê şerê taybetî kurdan demoralîze bikerê. Ganî şarê ma seba nînan hîşyar bibo. Gerîlayê azadîye hêrişanê vera Rayber Apoyî û tepişteyanê azadîye wisarî ra naya xoverdayîşê xo xurtêr kenê.  Herêma Serhedî de embaze Sema Koçer startê xoverdayîşî da û no xoverdayîş her ca ra vila bi. Herêmanê Pawitişî yê Medya de wextanê peyênan de çalakîyê serkewteyî ameyî kerdene. Gerîlayî her tim têkoşîn kenê. Her şehadet têkoşîn rûmetên keno. 

Dewleta tirke şerê taybetî kena, no îqtîdar îqtîdarê şerê taybetî yo. No şero taybet xorin o ke vera şarê kurdî yeno kerdene. Dişmenî hêrişê şehîdgehan kenê, pê metodanê gemarinan cenazaya gerîlayan danê keyeyanê ci yan zî tewr nêdanê.  Na hîşmendîye Îttîhat û Teraqî ra nata dewam kena. Seba ke hesabê nê îşxalkeran hetê Serek Apoyî ra ameyî pûçkerdene hêrişê şarê kurdî kenê. Senî ke nînan Dêrsim, Zîlan, Agirî, Sason de qirkerdişî kerdî hema zî bi heman hawayî dewam kenê. Senî ke gorê Şêx Seîd û Seyîd Rizayî çin ê nika zî bi heman hawayî goranê gerîlayan çin kenê. Seba ke ma verê nê kerdişan bigêrê ganî ma aktîf bibê, yewîya xo xurt bikerê.  Nê sere de Rayber Apo kesanê ke zîndanan de xo ver danê kenê hedef. No zî qelsîya înan temsîl kena. Nika zî bi hawayêkê sîstematîkî hêrişan kenê. Bêguman vera nê hêrişan yewîye û têkoşînê şaran zaf girîng o. Vera faşîzmî çend biîrade, biçêrî bêro vindayene hende têkoşîn aver şino, faşîzm çin beno. Eke ma vera faşîzm bêtewir bimanê o wext faşîzm hînî do hêzêr bibo û hêrişanê xo bizêdno.

Botan merkezê têkoşînê şarê kurdan o. Şarê kurdî sey Mehmet Tunç qet vera faşîzmî çok nêşi erdî ro. Coka hêrişê şarê Botanî kenê, dewanê înan veng kenê. Wazenê merdimî Botan de nefes zî megerê. Dormeyê Cûdî de bi seyan qarekol, ocaxê komurî, kalekolî virazîyayî. No şero taybetî ekonomîya Kurdîstanî ser o yeno kerdene. Dewleta faşîste pê qanûnan tebervejîyayîş qedexe kena, rewşanê îstîsnayîyan pare kena, şar koçber kena, xozaya Kurdîstanî talan kena. 

Dewa Mehrê ya asûrîyan de dewlete waşt ke qareqol biviraza û merdiman dewe ra biveja. La merdiman vera ney xo ver da, destûr nêda ney. Nika pê kiştişê asûrîyan, xirîstîyanan mesaj dana şarî. Dewlete wazena têkilîya mabênê Têgêrayîşê Azadîye yê Kurdîstanî û asûrîyan biherimna. La ma do xeyalanê Dayîke Beybûne bîyarê ca. Kurdîstan do bibo cayê pêro şaran, îşxal biqedo, her kes abigêro erdê xo. Ma xeyalanê Dayîke Beybûne û ap Hûrmûz Kurdîstanê azadî de do bîyarê ca.''