Endamê Fermandarîya Pêroyî ya QSDyî û Fermandarîya Meclîsê Leşkerî yê Dêrazorî Şehîd Ronî Welat ( Şêrewan Hesen) Şehîdgehê Sehîd Delîl Saroxanî de bi mêrasîmêkî bi hezaran kesî tewrê ci bîyî, ame definkerdene.

Rêxistinê komelê sîvîlî, endamê meclîsanê leşkerî û asayîşî, rîsipîyê eşîranê kurd û ereban, temsîlkarê partîyanê sîyasîyan, meclîsanê leşkerî û sîvîlan û Îdareyê Xoserî tewrê merasîmî bîyî.

Şarê ke cenzaya Şehîd Ronîyî Taxa Enteriye ra girewte bi slogana “Şehit Namirin” û tîlîlîyanê dayîkan ver bi şehîdgehî kewtî rayîr. Şehîdgeh de merasîm ame kerdene.  Hemserekê Meclîsê Keyeyanê Şehîdan ê Kantonê Qamişloyî Mahsûm Hesenî ke tîya qisey kerd, keyeyê şehîdî û şarê Rojawanî rê serweşîye waşte.

Hesenî bale ante têkoşînê Şehîd Ronîyî ser û vat Şehîd Ronî muraya mîyanî ya şorişê wayûbiratîye yê şaran bi. Hesenî wina dewam kerd: ''Dişmen seba ke îradeyê ma bikero zehîf û mabênê pabesteyan abikero Fermandar Ronî hedef giewt; la ma reyna vanê ma pêro pîya yê û heta ronayîşê welatê azad û demokratîkî têkoşînê ma do dewam bikero.''

Fermandarê QSDyî û Vervatoxê YPGyî Nûrî Mehmûdî zî bale ante şexsîyetê şorişgêrî yê Şehîd Ronîyî ser û nê vatî: ''Şehîd Ronî nimûneyê ruhê welatperwerîye, ehleq û kulturî bi. Semedê ronayîşê hêzanê leşkerî yê Îdareyê Xoserî mîraso pîl xo dima verda. Dişmenî bi hedefgirewtişê Şehîd Ronîyî waşt ruhê şorişgêrî yê şarê herême bimirno la ma do vera polîtîkaya dişmenî dahînîna xurtêr vinderê. Wa raştîya şerê taybetî û polîtîkayanê ke bi rayîrê ajan û hemkaran yenê rayraberdene, bêrê famkerdene. Ma sey QSDyî soz danê ke ma do rayîrê şehîdan teqîp bikerê, têkoşînî xurtêr bikerê û qesasê şehîdan bîgêrê.''

Badê qiseykerdişî belgeyê şehadetî yê Şehîd Ronî Welatî ame wendene û teslîmê keyeyê ci bi. Xalê Şehîd Ronîyî, Silêmanî zî vat ê do şehîdan teqîp bikerê.

Dima ra cenazaya Şehîd Ronî Welatî bi slogananê “Şehit Namirin” û tîlîlîyanê dayîkan ameye definkerdene.