Fermandarîya Qerargehê Merkezê Pawitişî yê Şarî (MPŞ) Înîsîyatîfê Kurdîstanî Bipawê rê mesajêk şawit û nê vatî:

''No demo muhîm ê tarîxî ke serê ameyoxê şarê Kurdîstanî de hewrê sîyayî gêrênê de şima dest pê karêkê muhîmî kerd. Şima her tewir rîsk girewt çim û ameyî Başûrê Kurdîsanî ke tehluke tîya de yo. Pîya bi aktîvîteyanê ke şima rayra benê îlankerdişê Înîsîyatîfê Kurdîstanî Bipawê zaf erjaye yo û manaya ci ya merdîmî esta. Paştdayîşê  şima moral da kurdîstanijaan û gerîlayanê azadîye. Bi nameyê Gerîlayanê Azdîye yê Kurdîstanî ma pê coşê şorişî şima pîroz kenê, selamanê xo şawenê.

Şima semedê  wayîrvejîyayîşê şarê kurdî ke heme heqanê Rojhelatê Mîyanênî ra mehrum ame verdayene û vergirwtişê pêkewtişê mabênê kurdan kewtî rayîr la vera nê tewirê şima yê dostîye, Başûrê Kurdîstanî de şima raştê muameleyê xirabî ameyî. No goreyê tradîsyonê meymanperwerîye yê şarê ma nêbi. Coka semedê nê tewiran ma dejnayî. Semedê nayî ma  şima ra ozrê xo wazenê. Naye bizanê ke şarê ma merdimanê sey şima yê ke bêhet têna semedê şarê Kurdîstanî haştîye wazenê rê do tim biminet hurmet ramojno.

Dost û hemrayê erjayeyî!

Ameyoxê şarê Kurdîstanî raşta zî binê tehlukeyê pîlî de yo. Dewleta tirke 2015î ra nata  heme hetanê xo yê faşîst û qirkerdoxî ameyî têhet û sey koalîsyonê AKP-MHP-Ergenekonî hukmat na ro. Têna yew nuqtaya înan a hempare esta a zî dişmenîya vera kurdan û Kurdîstan de caardişê polîtîkayanê qirkerdişî yo. Coka bi şerêkê topyekunî destkewteyanê şarê ma hedef kenê. Hêzanê ke vera Rayberîya ma Komployê Mîyanneteweyî kerd nika paştî danê rejîmê faşîst çeteyî. Sere de Îmrali de zîndanan de vera şarê û sîyasetê demokratîkî şîdeto pîl  û terorê dewlete yeno caardene. Dewleta tirke seba ke waştişê xo bîyarê ca wazana hêzê pawitişê şarê ma hêzê gerîlayî werte ra wedaro. Semedê nayî heme îmkanê xo yê teknîkî vistê dewre û çeka kîmyewîye şuxulnena. La rixmê nayî vera xoverdayîşê hêzanê ma netîce nêgena.

Hêzanê rejîmê faşîst-qirkerdoxî ke 23ê nîsane de herra Başûrê Kurdîstanî de operasyonê îmha û îşxalî da destpêkerdene raştê xoverdayîşî hêzanê ma ameyî. Seba ke tîya nêeşkeayî ser bikewê pêkewtişê mabênê kurdan fîna dewre ke kela zere ra feth bikerê. Rejîmê tirkî wazeno bi îmhkerdişê gerîlayanê azadîye Başûrê Kurdîstanî îşxal bikero û Tirkîya de sîstemê xo yê faşîstî bikero mende. Waştişê înan oyo ke pîya bi çeteyanê El Kaide û DAÎŞî herême de bibê hêzêk. Eke waştişê înan bêro ca no semedê herêma Rohelatê Mîyanênî û şaranê Ewropa zî tehluke yo.  Coka xoverdayîşê gerîlayan têna semedê kurdan nê semedê şaranê herême yo û xoverdayîşêko zaf muhîm o.

Dostê erjayeyî!

Têkoşînê ma sey esasî têkoşînê estbîyayîşî û azadîye yo. Ma sey şarî wazenê ke nê herran de sey merdimî biciwîyê. Ma sey hêzê xopawitişî bi paradîgmaya Rayber Apoyî vera terorê dewleta tirke xover danê. Hêzê ma vera dewleta tirke ya ke bi heme îmkananê xo yê teknolojî hêriş kena, xoverdayîşê bêhempa danê. Hela winayên de mîyanê şerî de ma senî eşkenê vera yewna hêzî şer bidê destpêkerdene. Bitaybetî na merhale de ma pêkewtişê mabênê kurdan sey felaket vînenî. Çi heyf ke rewşa nikayên ramojena ke her hele beno ke pêkewtişê zereyî dest pê bikero. Dewrê ma de heme meseleyî pê dîyalogî yenê çareserkerdene la ma xo mîyan de kewtî pozîsyonê pêkwtişî. No şerm o. Ma sey PKKyî û hêzê pawitişî yê şarê xo pê bawer ê ke mesela pê dîyalogî eşkena bêro çareserkerdene. Mabênê ma û PDKyî de meselayêka nêna çareserkerdene çîn a. Tîya têna mesele hêrişkarîya dewleta tirke û polîtîkaya  xelet a PDKyî ya. Çoka ma wazenê ke pê dîyalogî mesela çareser bikerê û kayê dewleta tirke pûç vejê. Wa no bêro zanayene ke ma semedê caardişê berpirsîyarîya xo hazir ê. Ma pê bawer ê ke kampanyaya şima ya vera îşxalê dewleta tirke û xebatê haştîye yê semedê dîyalogê mabênê kurdan do bi nameyê ercanê azadîye û demokrasîyî netîceya muhîmî vejo werte. Ma karê şima teqdîr kenê û nê karê bimbarekî de şima rê serkewtiş wazenê.

Bi hurmet û selamanê ma yê tewr xorîyan…''