Fermandarîya Yewinanê Xoverdayîşê Şingalî (YBŞ) bi wesîleya serrgêra 3. ya şehadetê Mam Zekî Şengalîyî eşkerayîye daye ke 15ê tebaxa 2018î de netîceya bombardumanê dewleta tirke ya îşxalkere de şehîd bibi.

Eşkerayîye de ame vatene ke Mam Zekî Şengalîyî seba azadîya Şingalî xeylêk kede daye û hêzanê qirkeran şexsê Mam Zekîyî de kultur û tarîxê êzidîyan kerdî hedef. YBŞyî da zanayene ke ê do qetî qesasê Mam Zekîyî bigêrê û sey YBŞ û YJŞyî têkoşînê xo dewam bikerê.

YBŞyî vat: ''Ma do seserra 21. bikerê seserra kurdan û şaranê Rojhelatê Mîyanênî û pê paradîgmaya Modernîteya Demokratîke rêxistin bikerê û pê serfîrazî xeyalanê Mam Zekî û şehîdan tacîdar bikerê. Roja 15ê Tebaxe hem roja şehadetê Mam Zekîyî ya hem roja Hemleya 15ê Tebaxe ya hem zî roja ronayîşê YBŞyî ya. Ma sey hêzanê YBŞ û YJŞyî senî ke Şingal azad kerd ewro zî rayberîya şehîdan de do xo ver bidê û qesasê Mam Zekîyî bigêrê. Ma do xeyalê Iraqê Federalî û Şingalê Xoserî yê Mam Zekîyî bîyarê ca. Ma soz danê xeyalanê Mam Zekîyî qetî pê serkewtişî tacîdar bikerê. Ma venga şarê xo danê ke pê ruhê bawerî û qesasî dormeyê YBŞ û YJŞyî de xo rêxistin bikerê.''