Sari Îbrahîm (Ramazan Topraş) fermandaranê qehreman, fedakar û heskerdoxanê welatê xo yê PKKyî ra yew bi. O mabênê 1982-2006 de tewrê bi seyan şerî bi û bi hezaran gerîlayê sey Kasim Engîn û Kadrî Çelîk perwerde kerdî.

Qala albumanê şehîdan ê 2006î de wina qala Sari Îbrahîm (Ramazan Topraş) yena kerdene: ''Embaz Îbrahîm 162 de Êlih de dadîya xo ra bîyo. 1978 de wexto ke wendekarê lîseyî bi tewrê PKKyî bi û Darbeya 12ê Êlule ra dima şi Lubnan. Tîya de o tewrê xebatanê agêrayîşê welatî yê PKKyî bi.''

Sari Îbrahîm 20-25ê tebaxa 1982yî de seba Kongreya Diyîne ya PKKyî şibi Başûr û bingeyê têkoşînê gerîlayan de bi wayîrê kedêka pîle.

Kadroyanê verênan ê PKKyî ra Alî Haydar Kaytanî wina qala ey kerdêne: ''Kongre ra dima zaf embazî derbazê Vakurî bîyî. Embaz Îbrahîm zî ma hetî de Başûr de mend. Ma Başûr de xebata propaganda, rêxistinîye û perwerdeyî kerdêne. Dima embaz Îbrahîm tewrê xebatanê amadekarîyanê 15ê Tebaxe bi.''

Sari Îbrahîm (Ramazan Topraş) heta şehadetê xo xeylêk waran de têkoşîn kerd û têkoşînê azadîye rêxistin kerd.

Ronayoxanê PKKyî ra Duran Kalkanî wina qala ey kerdêne: ''Embaz Îbrahîm Hemleya 15ê Tebaxe ra verî embaz Egîdî reyde tewrê çalakîyanê Botanî bi. Ey serranê verênan de Botan, Zagros û Behdînan de cabîyayîş de rolêko aktîf ard ca. Rixmê ciwanîya xo zî karê tewr zehmetî ey kerdî. Embaz Îbrahîm bibi tarîxê têkoşînî. Ey tim cepheyê milîtanî de ca girewt.''

Embazanê ey ra rojnameger Seyît Evranî derheqê ey de wina vat: ''Şar û gerîlayan ey ra zaf hes kerdêne. Coka ey rê vatêne 'Zehmetkêş.' Rojêke roportajêk de kişta ma ra qeçaxçiyî vîyartêne ra. Embaz Îbrahîm ewnîya înan ra û vat 'Destpêkê 80an de pereyê partîye çin bi. O çax sey gerîlayêkî mi barê înan kiriştêne û pere girewtêne. Ê Rojan ra ma resayî nê rojan. La ma gonîye daye, gan da.' ''

Rojnameger-nuştox Sefkan Kobanê seba Sari Îbrahîmî nê qisey kerdî: ''Ey Dengizê Reşî ra heta Amanosan gerîlayî ca kerdî. Koçgirî de cayê gerîlayan kerd mende. 2004 de o bi Fermandaro verên ê Hêzanê Xopawitişî. O sey leşkerêkî fermandarêko bêmexlûb bi.''

Şehîd Kasim Engînî derheqê ey de nê agahîyî dayî: ''Ma 1993 de Koyê Engîzekî de yewbînî şinasnayî. Ey perwerde dayêne ma, her xebate bi xo kerdêne. 6ê temmuza 1993yî de ma qezaya Îçme de çalakîyêke kerde. A çalakîye de 25 leşkerî û 8 qoricîyî kişîyayî. A çalakîye embaz Îbrahîm koordîne, îdare kerdbî. O zimistan kesêk bi îtîradker. O û leşkerî ameyêne Koçdagi ke embaz Îbrahîmî bivînê. Engîzek de zimistan çetin bibi. La embaz Îbrahîmî şertê xirabî ma rê vurnayî îmkan û verê dişmenî girewt.''

Endamê Konseya Merkezî ya PKKyî Şehîd Kadrî Çelîk (Apê Hus) vat: ''1990 da kampa Dorşînî de ey sey mamostayêke ma perwerde kerdî, tecrubeyê xo ma de pare kerdî. Ey Eyaletê Amedî gerîlayan rê akerd.

1991 de o derbazê Çewlîgî bi û uca de pratîkê girîngî mojnayî. Ey herêma ke ma tira vanê 'Herêma 6.' akerde û ma ameyî kişta Mûşî. Eyaletê Amedî de ma 1990 de 57 embazî bîyî la 1991 de ma bîyî 500 embazî. Ey tim kede dayêne la nêverdayêne qala keda bi biameyê kerdene. O qehremanêko bêname bi.''

Weşanxaneyê Meymanî nika derheqê Sari Îbrahîm (Ramazan Topraş) de kitabêkê bêhempayî amade keno. Embaz Perwero ke seba nê kitabî nuşteyêk nuşto, vano: ''Ma 1991 de Bongilan-Çewlîg de yewbînî şinasnayî. Ey fam kerdbi ke ma senî bêhal û qefilîyaye yê. Kesayetê ci de çareserkerdiş est bi. Ey cade moralê ma ard ca, meseleyê ma çareser kerdî. Dişmen bi serran Amanos de peyê ey de bi la tim bin kewt. Çunke embaz Îbrahîm goreyê qayîdeyanê gerîlatîye têgêrayêne. Embaz Îbrahîmî waştêne bi çêrî û merdî şer bikero û şehîd bibo. Beno ke embaz Îbrahîm qet nêfikirîyabi ke hetê xayînî û namerdî ra bêro şehîdkerdene. Çunke ey de qehremanî, humanîzm, bawerî, hêrsê vera dişmenî û perwerîya bi embazîye est bîyî. Tewirê ci, milîtanîya ci, israrê ci yê seba xeta Apogîre ma rê mîrasêko tewr pîl o. Ma soz danê ke bi pratîk û têkoşînê xo vîrameyîşê ey bipawê.''

Ramazan Toptaş yanî Sari Îbrahîm 1ê tebaxa 2006î de hetê kontrayêko ke dekewtbi mîyanê PKKyî ra ame şehîd kerdene.