Hemserekê DBPyî Keskîn Bayindirî pare kerd ke AKPyî serra 2015î ra nata hêrişê xo yê vera destkewteyanê şarê kurdî zêdînayî û vat ke şarê Tirkîya vera teda û zulmî dormeyê HDPyî de kom bîyî.
HDPyî vera caardişanê antîdemokratîkan dest pê prosesê çalakîyan ê demokratîkan kerdi. Na çarçewe de mabênê 15-20ê hezîrane de Colemêrg û Edîrne ra ver bi Anqara ''Rayraşîyayîşê Demokrasîyî yê Vera Darbe'' dabi destpêkerdene. Rayraşîyayîş 20ê hezîrane de Parka Meclîsî ya Anqara de eşkerayîye daye û deklarasyonê demokrasîyî eşkera kerd. Beşdaranê rayraşîyayîşî ra Hemserekê Partîya Herêman ê Demokratîkan (DBP) Keskîn Bayindirî derheqê armancê rayraşîyayîşî de qisey kerd.
Bayindirî vat: ''Ma Rayraşîyayîşê Demokrasîyî de dî ke şarê Tirkîya vera zulm û zordarîye dormeyê HDPyî de kom bîyî. Kombîyayîş û pêvînayîşê ma bi taybetî mîsyonê ameyoxî ser o bi. Armancê HDPyî yê rayraşîyayîşî no bi ke meseleya kurdî çarçewa demokrasî, têdûştî û edaletî de bêrê çarekerdene. Rayraşîyayîşê ma heman wextî de vera şîdetê serê cinîyan, apolîzebîyayîşê komelî zî bi.
Rixmê pêro propagandayan zî şarî paştdayîşê xo mojna. Ma do safhaya diyîne de zêdêr bêrê têhet û rayîrê xo dewam bikerê. Îqtîdarê AKP-MHPyî vera HDPyo ke sey hêzêkê muxalîfî yo, her roje vejîyeno û wazeno ke zemînê sîyasetî yê Tirkîya werte ra wedaro. Polîtîkayê şerî dewam kenê. Îqtîdar bi nê hawayî komel bêmuxalefet verdeno. Xora wexto ke Rayraşîyayîşê HDPyî dest pêkerd Başûrê Kurdîstanî dîya bombayan ver.
Ganî CHP zî tede hêzê muxalîfî seba çareserîya meseleya kurdan û meseleyanê bînan ê Tirkîya têbigêrê. Eke ameyoxê Tirkîya zî wina bibo çîyêk nêmaneno ke şarî rê bêro vatene. Prosesê bînî de ma vera nê îqtîdarî seba pawitişê destkewteyan ê tarîxîyan ê şarê kurdî bi taybetî Kurdîstan de xebatê xo xurt bikerê.''
