Senatorê Koma Hemwelatîyan a Komargere û Komunîstan a Fransa û Hetkarê Serekê Senatoyê Fransa Pierre Laurent sey endamêkê Heyetê Haştîye şi Başûrê Kurdîstanî û tay pêvînayîşî kerdî.

Laurentî pare kerd ke seba ke hêrişan vindarnê û paştdayîşê xo bimojnê ê ameyê herême û vat: ''Ma ameyî tîya ke bêvengîya Ewropa bişiknê zî. Ewro Kombîyayîşê Berzî yê NATOyî de beno ke Tirkîya ra destûr bidîyo ke goreyê zerrîya xo hêrişan bikera. Ma wazenê atmosferêkê winasênî virazê ke verê ney bigêrê.''
Laurentî da zanayene ke wexto ke o û embazê ci ameyî herême înan rê dekewtişê herême qedexe bi û vat: ''Mi dima Wezaretê Karanê Teberî ra destûr girewt la embazê mi agêra. Astengkerdişê Heyetê Haştîye skandal o.''

Laurentî pare kerd ke Hewlêr de înan temsîlkaranê YNK, Têgêrayîşê Goranî, parlamenteran reyde pêvînayîşî kerdî û nê pêvînayîşî do dewam bikerê. Laurentî vat: ''Ma vizêr Wezîrê Karanê Teberî reyde pêvînayîşî kerdî. Wezîrê Karanê Teberî nameyê PDKyî ser o pêvînayîş kerd. Ameyîşê wezîrî nêzdîbîyayîşêko pozîtîf o, yeno manaya dîyalogan. Wezîrî cewabê pozîtîfî nêdayî persanê ma la ma do karanê xo rê dewam bikerê. Ma do verê ofîsê Neteweyan ê Yewbîyayeyan de kombîyayîşê çapemenîye bikerê û paştdayîşê xo yê enternasyonalîstî bimojnê.

Ganî NATO  nê hêrişan vindarno. Kurdan vera DAÎŞî şer kerd. Beno ke NATO kurdan bikerê qurbanê menfaatanê xo. Ganî çew kurdan ra rîyê xo nêzivirno. Tirkîya û Erdoganî vera kurdan cerganê DAÎŞî reyde pêkerd. Ma paştî danê kurdan ke ameyoxê xo, îdareyê xo awan bikerê. Rayaumûmîya dinya zî ganî vera polîtîkayanê Erdoganî wurza payan ser û paştî bida kurdan.''