Gerîlayê HPGyî Alîşer Agir Amedî bi vîdeoyêkî venga keyeyê xo yo ke verê bînaya HDPyî ya Amedî de ronişeno da ke wa wayîrê dewaya gerîlayan vejîyo.

Gerîla Amedî verî qala hîkayeya tewrbîyayîşê xo kerd:

''Ez 2015 de dima ke pê qirkerdişê vera kurdan hesîyaya tewrê gerîlayan bîya. Wexto ke mi dişmen şinasna zerrîya mi de hêrsêk bi pîl. Coka mi bire daye ke ganî ez vera nê zulmî têkoşîn bikera. Nê esasî ser o ez tewra partî bîya.

Rayber Apoyî şarê ma hewnî ra şîyar kerd, cuya raştikêne û rayîro raştikên mojna. Ez zî binê tesîranê fikranê ey de menda. Ez sey yew gerîlaya azadîye û kadroyê PKKyî vera dewleta tirke nê têkoşînî de ca gêna. Heta nefesê xo yê peyênî ez do vera kolonyalîzm û faşîzmê tirkan têkoşîn bikera.

Artêşa dişmene de îrade nêmend. Tewr peyêne Garê de na raştîye dîyaye. Dewleta tirke nê prosesî de xîret kena ke pê zûran nê şerî îdare bikera.

Dewleta tirke pê zûran keyeyanê ma xapînena û înan verê bînaya HDPyî de nişnena ro. Ma vera dişmenî têkoşîn kenê û dewaya xo ya heqdarî rê dewam kenê. Raşt nîyo ke keyeyê ma hetê dişmenî de ca bigêrê û venga ma bidê. Çunke no yeno manaya bêbextîye. Wa keyeyî baldar bibê û dewleta tirke hol analîz bikerê. Wa keyeyê ke verê HDPyî de ronişenê vera dewlete têkoşîn bikerê. Wa keyeyê ma hetê domananê xo de ca bigêrê û vera dişmenî têkoşîn bikerê.

Mi dî ke keyeyê mi zî şîyo verê bînaya HDPyî. Ma keyeyanê xo ra wazenê ke wa wayîrê dewaya ma ya heqdare vejîyê. Domananê xo rê bêbextîye mekerê. Ma pê îradeyê xo cuya gerîlatîye weçînaye. Dewleta tirke wina propaganda kena ke seke çewî ma xapînayo. Ma pê hîsanê şorişgêrîye tewrê gerîlayan bîyî û sey kadroyê PKKyî têkoşînê azadîye danê. Wa keyeyê ma na raştîye bivînê.

Ez keyeyê xo ra wazena ke wa na xeletîye ra fek vera bidê. Oyo raşt têkoşînê vera dewleta tirke yo. Ma ewro mîyanê rewşa şerî de ciwîyenê.

HDP mîyanê dîstemê dewleta Tirkîya de ca gêno û partîyêka sîyasî ya. Yew eleqeyê ma tede çin o. Ne HDP ne zî hezêko bîn eşkeno ma vejo koyan yan zî koyan ra bîyaro war. Wa keyeyî zî goreyê na raştîye têbigêrê. Eke keyeyî hetê ma de ca bigêrê ma eşkenê welatê xo bixelisnê. Ma ewro welatê xo de yê, koyanê xo de yê. Ma koyan de seke verarê dadîya xo de yê wina têkoşîn kenê. Coka wa pêro dadî û keyeyî zerrîrehet bibê. Eke nêeşkenê seba ma çîyêk bikerê wa têna dûayan bikerê.''