Gerîlayê azadîye yê Kurdîstanî Berxwedan Argeşo ke keyeyê ci verê bînaya HDPyî de ronişeno derheqê raştîya dewleta tirke de qisey kerd û qala ci kerde ke çira tewrê gerîlayan bîyo.

Argeşî vat: ''Ez keyeyêkê welatperwerî de bîya, keyeyê mi mîyanê sîstemê dewlete de bi hawayêkê normalî ciwîyayêne. Na rewşe mi rê normal nêameye. Dima hêdî hêdî mi dişmen şinasna. Mi fam kerd ke sîstem kurdan rê se keno, kurdî kam ê. Coka serra 2019 de ez tewrê gerîlayan bîya.

Tewrbîyayîşê mi de sebebo verên no bi ke cuya nê sîstemî cuyêka merdimîye nêbi. Merdiman û kurdan rê polîtîkayê gemarinî yenê kerdene. Kêm zêde mi cuya PKKyî şinasnaye. Dima ez ameya tewr bîya. Nika ez mîyanê HPGyî de ya.

Ma tîya de cuyêka azade û têdûşte ciwîyenê. Şerê ma vera sîstemê modernîteya kapîtalîste yê. Ma cuyêka winasêne ciwîyayêne ke ma kurdayetîya xo nêşinasnayêne. La ma koyan de kurdayetîya xo şinasnaye.

Ez ameya koyan, mi gamêke eşte û mi xo xelisna. Koyanê azadan de mi nefes girewt. Nika ez mîyanê HPGyî de vera pêro gemarîyan şer kena. Ez seba azadîya şarê xo şer kena.

Dewlete seba ke ciwanê kurdî nasnameyê xo meşinasnê polîtîkayanê taybetan ana ca. Sîstemê dewlete gemarin û xirab o. Wa ciwanê kurdî nê sîstemî hol bişinasnê.

Dewlete keyeyê gerîlayan verê HDPyî de nişnayî ro. Çira dewlete ney Amed de kena? Çunke Amed şaristanê xoverdayîşî yo, paytext o. Dewlete verê bînaya HDPyî ya Amedî de şerê taybetî kena.

Ma do azadîya xo û dewaya xo ra fek vera nêdê. Ma pê felsefeya Rayber Apoyî bawer ê û ma rayîrê ci de şinê. Felsefeya Rayber Apoyî de fikryayîşê azadî, têdûştî û ferasetê neteweya demokratîke estê. Coka ganî keyeyî mexapîyê. Keyeyan ser o gef û tesîr estê. La ma do heta peynî rayîrê xo dewam bikerê.

Ez venga keye û ciwanan dana ke wa pê polîtîkaya şerê taybetî ya dewlete mexapîyê, wa nêbê hacetê kayanê dişmenî. No sîsten nêwazeno kurdî xo bişinasnê, Wa keyeyî baş bizanê ke ciwanê kurdî koyan de sereberz ê û bi rûmetî ciwîyenê. Ez têna venga keyeyê xo nê venga pêro keyeyan dana ke wa mexapîyê, pê kayanê dewlete bihesîyê.

Dewlete PKK xirabe mojnena la cuya raştikêne mîyanê PKKyî de ya. Ez venga ciwanan ê kurdan dana ke wa xo bişinasnê û raştîya xo bivînê. Wa hayîya înan pê polîtîkaya gemarine bibê.

Ciwanê kurdî nêeşkenê kurdkî qisey bikerê. Merdimî ya maruzê îşkenceyan yan zî maruzê gefan manenê. Ganî ciwanî vera nê zulmî sere wedarê û cuya azade biweçînê. Ciwanî wa tewrê gerîlayan bibê. Wa keyeyê ma zî pê ma sereberz bibê. Se beno wa bibo no têkoşîn do dewam bikero.

Keyeyî wa xoverdayîş, têkoşîn û raştîya Amedî xo vîra nêkerê. Wa xoverdayîşê Sûrî yê 2015-2016 xo vîr a nêkerê. Wa qirkerdişê dewleta tirke xo vîr a nêkerê. Wa ciwanê kurdî vera dişmenî hêrs bibê. Ma tîya de cuya azade ciwîyenê û hayîya ma pê raştîye esta. Heta ke Rayber Apo azad bibo, ma do têkoşînê xo dewam bikerê. Heta ma Kurdîstanê azadî awan bikerê ma do têkoşînê xo dewam bikerê. Ganî ciwanê kurdî bêrê tewrê gerîlayan bibê.''