Koyî cenetê rîyê erdî yê. Esbîyayîşê merdimîye ra heta roja ma timûtim bîyî meceraya cuye yê. Cuye pê ahenkê koyan beno rind. Koyî tim semedê merdimîye mekanê pawitişî yê. Heme îşxal û zulumî kaşanê tujan û qilanê berzan, daristanan û awanê xirçinan ê koyan de bin kewtî.  Cuya azade tim koyan de ameya ciwîyayêne. Semedê şerwananê Kurdîstanî zî manaya koyan no yo.

Gerîlaya YJA Starî Roje Argeş semedê Xakurkê ke koyanê tewr rindan ê Kurdîstanî ra ya nînan ana ziwan: ''Xakurkê cenetê gerîlayan o. Xakurkê semedê gerîlayan sey maye yo. Senî ke yew maye domananê xo pawena û resnena Xakurê ke gerîlayan wina resnena û pawena.''

Koyî semedê şaranê bindestan pusulayê azadmendişî yê. Warê Xakurkê rixmo ke bi serren o tede şer qewimîyeno ma ercnayîşê gerîlayan ra vînenê ke, gerîlayî tewr zaf xo tîya de nas kenê û cuya xo bimana kenê.  Gerîla Roje Argeş derheqê proseso ke Xakurkê de menda wina vana: ''Xakurkê cayo verên o ke ez tewrê gerîlan bîya, coka semedê mi manaya ci cîya ya. Senî ke merdim/e cayêk de yeno dinya ez zî tîya senî ke newe ra bêrê dînya. Mi tîya nasnameyê o ferq kerd û xo sarisna.''

Xakurkê semedê gerîlayan cayê pawitişî yo. Her kerr û dare ci gerîlayan pawenê. Ti çayê ci de bimanî ti pawena. Tarîx de xeylêk kesî ameyî şîyî. Nînan ra yew zî Îskendero Pîl o. Gama ke tîya ra ravêrto vato 'tîya cenet o' raşta zî Xakurkê cenetê gerîlayan o. Gerîla qey hende na cografya rê giredaye yo? Çunke tîya rêçê tarîxî estê û nê kerra, koyan û magarayanê ci de yenê vînayene. Tîya wextê ciwîyayîşê merdimîye yeno hîskerdene. Gerîlayê ke xoza reyde ciwîyenê tarîxî tewr zaf ê hîs kenê.

Şeran de helê tarîxî estê ke qederê zaf çîyan bedilnenê. Nê helanê krîtîkan de ti qerar gena/î. Gerîla Roje Argeş derheqê qehremanîye ke ewro Xakurkê de yena ciwîyayene de nînan vana: ''Ez warê Xakurkê de zaf menda. Gerîlatîya nê warê cenetî hêzê pîlî dano ma. Xakurkê kelaya xoverdayîşî ya. Tîya qehremanîya bi hezaran şehîdan esta. Senî ke embaze Bêrîtane vera xayînîye bi şerkerdişê qehremankî bîye bêmerg, Xakurkê de bi hezaran embazê cinî û camêrdî sey embaze Bêrîtane bîyî bêmerg. Wezîfeyê ma oyo ke ma bibê layîkê nê qehremanan û qesasê înan bigîrê.''