2014 de dewleta tirke vera Têgêrayîşê Azadîye yê Kurdan û şarê kurdî ‘planê çokdayîşî’  fîna dewre û polîtîkayanê qirkerdişî dest pêkerd. Hukmatê AKPyî yo ke tim wazeno gonîya kurdan birişno waşt vera kurdan konseptê îmhayî bi destê DAÎŞî bîyaro ca.

Xeylêk hêzan vera DAÎŞî peyser game eşte û no zî semedê paştgeranê DAÎŞî yew firset bi. Têgêrayîşê Azadîye yê Kurdîstanî xeta Rayber Apoyî de xoverdayîş esas girewt û Şingal, Mexmûr, Kerkûk û Kobanê de vera çeteyan têkoşîn kerd û serkewtî. Naye ser o sîyasetê qirkerî derbeyo gird werd. Bitaybetî Şingal û Mexmûr de mudaxaleyo verên ê gerîlayan verê felaketa girde ya merdimîye û qirkerdişê vera kurdan girewt. Şarê kurdî vera DAÎŞÎ û grûbanê selefîyan bi fedekarîye têkoşîn kerd.

Serkêşîya Têgêrayîşê Azadîye yê Kurdîstanî de bi hezaran şehîdî ameyî dayene û destûr nêdîya ke DAÎŞ Rojhelatê Mîyanênî de împaratorîya xo rono. Gerîlayanê HPG û YJA Starî bi fedakarîya pîle çeteyî bin fînayî. Na raştîya tarîxî ya ke ganî çew xo vîra mekero.

Fermandarîya Qerargahê Merkezê Pawitişê Şarî bi eşkerayîya xo peyêne da zanayene ke gerîlayê ke 2014 de dest pê pawitişê Kampa Multecîyan a Mexmûr kerd, mîsyonê xo ard ca û agêrayî waranê xo. O proses de û dewamê ci de çi qewimîya, ganî raşt bêro famkerdene.

Mexmûr û hêrişê DAÎŞî

Seke yeno zanayene Kampa Multecîyan a Şehîd Rustem Cûdîyî (Mexmûr) bi serran o vera hêrişanê dewleta tirke xover dana. Bi hezaran welatperwerê ke dewleta tirke dewê înan vêşnayî verê xo da Başûrê Kurdîstanî, tîya zî raştê zextanê PDKyî ameyî. Bi hezaran kurdan nizdê 30 serran o na kampe de sîstemê xo nayo ro û rixmê heme zextan û hêrişan tewirê xo yê welatperwerî pawenê.

DAÎŞê ke 2014 de her ca açarna gola gonî û bi sebebê ters û xofî hemê hêzê leşkerî yê herême peyser qeldayî. Tay waran de pêşmerge û leşkeranê artêşa Iraqî qet pêkewtiş nêkewtî cade remayî. PDKyo ke hemkarîya hêrişanê dewleta tirke keno, seba ke qet tedbîrêk nêgirewt, 7ê tebaxe de DAÎŞî  hêrişê Kampa Şehîd Rustem Cûdîyî kerd la nê hêrişî senî ke ameyî plankerdene wina dewam nêkerd. Çunke DAÎŞ çarçewaya planêkî de hêriş bikero zî eslê xo de waştêne herêmanê bînan ê Başûrê Kurdîstanî bifîno dest, çim verdabi waranê ke binê kontrolê PDKyî de yê. Bado ke bajarekê Giwêrî yo ke 70 kîlometre Hewlêrî ra dûrî de yo, kewt destê DAÎŞî tay pêşmergeyî biney cewab bidê zî dima ra peyser ancyayî. Şar tersî ra rema. Îdarekaranê Başûrê Kurdîstanî têdima eşkerayîye daye. Xora çewî nêzanayêne ke her kesî verî ê hay remenê. O wext Mesud Barzanî Têgêrayîşê Azadîye yê Kurdîstanî rê mektubêk nuşt û hêzanê gerîlayan ra hetkarî waşte.

Gerîlayî resayî şarê Mexmûrî

Gerîlayê Azadîye yê Kurdîstanî yê ke çar leteyanê Kurdîstanî de şarê kurdî pawenê merg girewt çim û tewr verî ê resayî gazîya şarê Mexmûrî. Verî fermandarîya Şehîd Tekoşer Şemzînanî de 7 kesan ra grûbêke resaye hetkarîya şarê Mexmûrî. 7 gerîlayan çîyo ke artêşa 70 hezaran kesan nêkerd, kerd û ciwanê kampe rêxistin kerdî, torra xoverdayîşî na ro û destpê têkoşînî kerd. Gerîlayan şar girewt binê asayîşî û vera çeteyanê DAÎŞÎ dest pê pêkewtişî û peyserqeldayîş kerd. Şingal de 12 suvarî yê ke fermandarîya Şehîd Dilşêr Herekolî de vazdayî gazîya şarê êzidî û Mexmûr de 7 sûvarî yê ke fermandarîya Şehîd Tekoşêr Şemzînanî de merg girewt çim û şar pawit tarîx de sey efsaneyî cayê xo girewt.

Xoverdayîşê Mexmûrî Hewlêr xelisna

Têkoşîno tarîxî yê hîrê rojan ê Mexmûrî Hewlêro ke nêmeyê ci amebi vengkerdene û cayê bînî xelisnayî, nêverda bikewê destê DAÎŞî. Çîyo ke bi hezaran hêzanê artêş û pêşmergeyan nêkerd, gerîlayan kerd. Paşta şarî bîye pêt. Badê hîrê rojan DAÎŞo  ke Mexmûrî ra peyser agêra, şi ci ser û badê 5 rojan Mexmûr û dormeyê ci çeteyan ra bîyî pak. PDKyo ke tim dişmenîya Têgêrayîşê Azadîye yê Kurdîstanî keno, a roje gerîlayî pîroz kerdêne. Çunke zanayêne ke gerîlayan ra nêbîyêne ê zî nêeşkayêne xo bipawê. PDKyî xeyrê têkoşînê gerîlayan cesaret kerd ke vera çeteyan şer bikero. Şingal de 17 hezar pêşmergeyî bibî la qet guleyêk nêteqna peyser agêrayî. Musul de hêzo tewr tewr pîl ê diyînî yê artêşa Iraqî bibi la Musul yew di saetan de kewt destê DAÎŞî. Îanê ke gerîlayî pîroz kerdêne bado ke DAÎŞ bin kew, dişmenîya tewr pîle mojna. Têkoşînê vera DAÎŞî de şarê kurdî û hêzanê gerîlayan ra bi hezaran kesî şehîd bîyî.

Gerîlayî temînatê estbîyayîşê şarî yê

Rejîmo faşîst ê AKP-MHPyî 2015î ra nata  çarçewaya planê çokdayîşî’ de vera şarê kurdî hêrişê qirkerdişî keno. Çend hêriş keno bin kewno la çend bin kewno zafêr hêriş keno. Se keno wa bikero nêeşkeno xoverdayîşî gerîlayan bişikono û meeşko zî. Gerîlayan HPG û YJA Starî 2014î ra nata şarê Mexmûrî pawit. Gerîlayan sey Kobanê û Şingalî Mexmûr de mîsyonê xo bi serkewtişî ard ca. Peyserancîyayîşê gerîlayan zaf muhîm o û ganî raşt bêro famkerdene. Wa no tim bêro zanayene ke semedê gerîlayan çîyo tewr muhîm têkoşînê azadîye û estbîyayîşî yê kurdan o. Gerîlayê Azadîye yê Kurdîstanî temînatê estbîyayîşê şarê kurdî yê.