Hêrişanê îşxalî yê dewleta tirke yê vera herêmanê Zap, Metîna û Avaşînî 25 rojî xo pey de verdayî. Hemleya Cengê Xabûrî zî semedê çinkerdişê artêşa îşxalkere dîyaye destpêkerdene. Ma seba ke gerîlayanê hemle bivînê  cepheyê şerî yê Metîna de yê. Gerîla Rojîne Serhildan derheqê şerî de agahîyî dayî, bale anye xoverdayîşê Girê Zendûra ser.

Gerîla Rojîne vat: ''Artêşa îşxalkere vera ma teknolojîyêka pîle şuxilnena. La leşkerê tirkî manewîyat û ruhî ra bêpar ê. Embazanê ma de moralêko pîl û manewîyat esto. Giranê Zendûra, Derarê û Koordîne de xoverdayîşêko pîl yeno kerdene.''

Gerîla Rojîne Serhildan da zanayene ke înan sey gerîla û fermandaranê xoverdayîşê 'Cengê Xabûrî' şarê welatperwerî û hunermendanê Başûrê Kurdîstanî rê mektubêke nuşte.

Mektube wina ya:

''Şar û hunermendê welatperwerî yê ercîyayeyî yê Başûrî;

Seke zanîyeno kolonyalanê tirkan menga fîraze ya Remezanî de seba çinkerdişê xoza û kulturê Kurdîstanî, nê koyan de dest pê şerêkê pîlî kerd. Ma welatê xo pawenê, pê fedakarîyêka pîle şer kenê. Ma zanenê ke erdê fîrazî de herêma Behdînanî de herikîyayîşê tarîxî de vera îşxalkeran bedelê pîlî dîyayî. Nê dewî reya verêne nênê vêşnayene û vengkerdene. Rejîmê Baasî ra heta rejîmê Erdoganî yê faşîstî, hêzanê kolonyalîstan zaf reyî nê dewî rijnayî.

Vera hêrişanê qirkerdişî yê peyênan ma di xetê xoverdayîş û pawitişî ronayî. Oyo yewîn baskê xoverdayîşî yo ke pê gerîlayanê HPG û YJA-Starî yê ke tewrê Hemleyanê Cengê Xabûrî û Bazanê Zafrosî bîyî, geş bîyo. Oyo diyîn zî awazê Eyaz Yûsûf, Erdogan Zaxo û Tehsîn Tehayî yo ke ewro pê deyîra Zinarên Kêste yên serbilind' a Hesen Şerîfî veng dano. Nêbo ke ma destûr bidê ke nê vateyê Bedirxan Sindî yê Ey felek ji bo çi dinalî, bo çi nêrgiz çilmisî, ma çima bextê me hoye, em bêdost û bêkes in' newe ra raşt bibo.

Dostê ma koyê berz ê. Fedayîyê Kurdîstanî û hunermendê kurdî wayîrê raştikênî yê nê erdî yê. Îqtîdarî menfaatanê xo fikirîyenê wa bifikirê; welatperwer, gerîlayî, pêşmerge û hunermendê kurdî ganî mil bi mil, pê hîsanê neteweyîyan vera kolonyalîzmî têkoşînê xo pîl bikerê.

Senî ke Hesen Şerîfî vêşnayîş û vengkerdişê dewa Kêste ser o deyîrêke amade kerde, senî ke Bilind Îbrahîm derheqê xoverdayîşê Efrînî de derîye vat ma pê bawer ê ke hunermendê kurdî bi taybetî hunermendê Başûrê Kurdîstanî û herêma Behdînanî, seba pîlkerdişê nê têkoşînê fîrazî veng, awaz û deyîra xo pa vengê tifingê gerîlayan bikerê yew.

Nê bingeyî ser o ma reyna şima pêroyînan selam kenê û sozê xo yê seba pawitişê nê erdê fîrazî reyna danê şarê kurdî.

Şerwan û fermandarê Cengê Xabûrî.''